O‘zbekiston Markaziy banki endi xorijiy valyutalar kursini har kuni e’lon qiladi

Xalqaro press-klubning 2021-yil 6-yanvar kuni o‘tkazilgan navbatdagi sessiyasida Markaziy bank raisi o‘rinbosari Behzod Hamroyev xorijiy valyuta kurslarining almashinuv qiymati bo‘yicha ma’lumotlar bosh regulyator tomonidan har kuni e’lon qilinishini aytdi, deb xabar bermoqda “Kun.uz”.

Ta’kidlanishicha, 2021-yilning fevral oyidan boshlab valyuta birjalari har kuni soat 10:00 dan 15:00 gacha doimiy ishlaydi. Birja ish kuni yakunlangandan, keyin Markaziy bank birjadagi o‘rtacha narxlardan kelib chiqqan holda, har kuni valyuta kurslarini yangilab boradi.

Hamroyevning ta’kidlashicha, Markaziy bank tomonidan 2021-yil amalga oshirilishi maqsad qilingan asosiy rejalardan biri – milliy valyutaning chet el valyutasiga qaramligini kamaytirish va inflyatsiya darajasining 10 foizdan oshib ketmasligini ta’minlashdir.

Shuningdek, tadbirkorlar tijorat banklaridan onlayn tarzda buyurtma berib to‘g‘ridan to‘g‘ri valyuta xarid qilish imkoniyatiga ega bo‘lishadi.

Eslatib o‘tamiz, Prezidentning Oliy Majlisga yo‘llagan Murojaatnomasida 2021-yilda narx-navo o‘sishini 10 foizdan oshirmaslik Markaziy bank va hukumatning asosiy vazifasi bo‘lishi kerakligi ta’kidlangandi.

Avvalroq 2020-yil uchun inflyatsiya darajasi 11,1 foizni tashkil etgani haqida xabar berilgandi.