O‘zbekistonda 2023-yilga borib inflyatsiyaning doimiy maqsadli ko‘rsatkichi (target) 5 foiz darajasida belgilanishi mumkin. Bu haqda Markaziy bank raisi Behzod Hamroyev 21-yanvar, payshanba kuni o‘tkazilgan matbuot anjumanida ma’lum qildi, deb xabar beradi “Gazeta.uz”.

Foto: “Daryo”

Davlat budjeti to‘g‘risidagi qonunning asosiy makroiqtisodiy ko‘rsatkichlar rivojlanish prognoziga ko‘ra, 2021-yilda inflyatsiya darajasi 9—10 foiz, 2022-yilda 10—11 foiz, 2023-yilda 7—8 foiz bo‘ladi. Bu inflyatsiyani 2022-yilda 8 foizgacha, 2023-yilda esa 5 foizgacha pasaytirishni rejalashtirgan Markaziy bank prognozlaridan farq qiladi.

Foto: “Gazeta.uz”

Behzod Hamroyev Markaziy bank va Moliya vazirligining (2021-yilgi Davlat budjeti to‘g‘risidagi qonunni ishlab chiqqan) inflyatsiya borasidagi prognozlari trayektoriyasida farq borligini tan olgan, chunki “har bir organning mustaqil prognozi bo‘lishi mumkin”.

“Ammo o‘ylashimcha, biz 2023-yilda inflyatsiya borasida 5 foizli targetga erishamiz. Buning uchun kerakli barcha narsa bor. Bu Markaziy bankning shunchaki xohishi emas, uning asosida turli omil va ta’sirlar hisobga olingan aniq hisob-kitoblar yotibdi”, — deydi u.

2020-yilning aprelida moliya vaziri o‘rinbosari Odilbek Isakov energiya tashuvchilar narxini erkinlashtirish bo‘yicha oldingi rejalar koronavirus pandemiyasi sabab noma’lum muddatga qoldirilganini ma’lum qilgandi.

Noyabr oyida hukumat gaz va elektr energiyasi tariflarini 2021-yilgacha o‘zgarishsiz qoldirishi ma’lum bo‘lgandi. Markaziy bank raisi o‘rinbosarining aytishicha, bu inflyatsiya darajasini 10 foizdan pastroq darajada ushlab turishning muhim omillaridan hisoblanadi.

Behzod Hamroyevning ta’kidlashicha, Markaziy bank uchun bazaviy inflyatsiya (meva va sabzavotlar narxlari hamda tartibga solinadigan narxlar hisobga olinmaydigan inflyatsiya — tahr.) asosiy ko‘rsatkich bo‘lib xizmat qiladi. Agarda energoresurslar narxining liberalizatsiyasi bo‘yicha choralarning asosiy qismi 2022-yilda, qolgani 2023-yilda qabul qilinsa, bu “ushbu vaqtga borib, bazaviy inflyatsiya darajasini kamaytirish uchun vaqt va imkoniyat beradi”.

“Prognozimizga ko‘ra, 2022-yilda 8 foiz darajasida inflyatsiyani kutyapmiz, bunda tartibga solinadigan narxlarning o‘sish ta’siri hisobga olingan. 2023-yilda esa, albatta, inflyatsiya 5 foizgacha pasaytiriladi”, — deydi u.

Markaziy bank 21-yanvar kuni asosiy stavkani yillik 14 foiz darajasida o‘zgarishsiz qoldirdi. Regulyator 2021-yilda YaIMning 4,5—5,5 foizga o‘sishini, inflyatsiya esa 9—10 foizgacha pasayishini kutmoqda.