Самарқанд шаҳрида жамоат транспорти ва йўналишсиз такси ҳайдовчилари ўртасида жанжал келиб чиқди, дея хабар берди «Дарё» мухбири.
Таъкидланишича, воқеа 2021 йилнинг 22 январь куни соат, тахминан, 09:30 да йўловчи талашиш натижасида келиб чиққан.
Самарқанд вилоят ИИБ ахборот хизматининг аниқлик киритишича, ҳолат юзасидан Самарқанд шаҳри бўйича ИИО ФМБ 6-сонли ИИБ ходимлари томонидан терговга қадар суриштирув ҳаракатлари олиб борилган ва ҳуқуқбузарликни Оқдарё туманида яшовчи 1996 йилда туғилган К.О. ҳамда К.Х., 1979 йилда туғилган А.А., Оқдарё туманида туғилган 1996 йилда туғилган Р.T., 1984 йилда туғилган Б.З. содир этгани аниқланган.
Маълум бўлишича, Самарқанд шаҳрининг Даҳбед ва Рўдакий кўчалари кесишган чорраҳа яқинида киракашлик фаолияти билан шуғулланувчи ушбу шахслар йўловчи талашган ва жанжал чиқариб, жамоат тартибини бузган.
Ушбу ҳуқуқбузарликни содир қилган барча шахсларга нисбатан Маъмурий жавобгарлик тўғрисидаги кодекснинг 183-моддаси (майда безорилик)га асосан маъмурий баённома расмийлаштирилиб, тўпланган ҳужжатлар қонуний қарор қабул қилиш учун Жиноят ишлари бўйича Самарқанд шаҳар судига юборилган.
Бундан ташқари, автобусга белгиланган меъёрдан ортиқ йўловчи олиб ҳаракатланган ҳайдовчига нисбатан маъмурий тартибда чора кўрилиб, вилоят Транспорт бошқармаси ходимлари билан биргаликда профилактик суҳбат ўтказилган.
Изоҳ (0)