Ўзбекистонда электр энергетика соҳасидаги мавжуд стандартлар халқаро стандартлар асосида босқичма-босқич қайта кўриб чиқилмоқда. Энергетика вазирлиги матбуот хизматининг хабар беришича, шу мақсадда Франциянинг Assystem Engineering and Operation Services S.A.S корхонаси жалб этилган.
Вазирлик бошчилигида 4 та ишчи гуруҳ ташкил этилган бўлиб, улар таркибида ишлаб чиқарувчилар, эксплуатация қилувчи корхоналар ҳамда лойиҳа институтларининг етакчи мутахассислари ўрин олган.
Қайд этилишича, юқори кучланишли электр узатиш тармоқлари, подстанциялар, реле ҳимояси ва маълумотлар алмашинуви ҳамда электромагнит мослашувчанлик йўналишидаги 700 дан ортиқ стандартлар кўриб чиқилди.
Ушбу стандартлардан 536 таси замон талабларига жавоб бермайди деб топилган. Уларни халқаро стандартларга алмаштириш жараёни «Ўзстандарт» агентлиги томонидан амалга оширилади.
2021 йилда паст кучланишли электр тармоқлари, қуёш ва шамол электр станцияларини тармоққа улаш йўналишлари бўйича стандартлар кўриб чиқилиб, замон талабларига мослаштирилади.
Хабарда айтилишича, янги стандартларнинг қабул қилиниши орқали электр энергетика объектларини лойиҳалаш, қуриш ва эксплуатация қилишни техник бошқаришда сарф-харажатларнинг оптималлаштирилишига ҳамда электр тармоқларининг ишончлилигини оширишга эришилади.
Эслатиб ўтамиз, 2020 йилда Президент қабулхоналарига келиб тушган 1 миллиондан ортиқ мурожаатларнинг 37 874 таси электр энергияси таъминотидаги узилишлар билан боғлиқ бўлган.
Изоҳ (0)