Франциянинг энг юқори мукофоти − «Цезарь»ни олган биринчи қора танли актёр, беш фарзанднинг бахтли отаси, продюсер, жамоат арбоби ва энг нуфузли ва машҳур одамларидан бири. Бутун дунё унинг «1+1» фильмидаги Дрисс образи орқали яхши кўриб қолган. Актёр гўёки ушбу фильмда ўзини ижро этганга ўхшайди. Хўш, Франциянинг энг машҳур актёри ҳақида нималар маълум?
Актёрнинг карьераси ёлғондан бошланган
Биринчи марта Омар мактаб ўқувчиси сифатида машҳур комик актёр Жемал Дебузнинг Радио Нова шоу-дастурида чиқиш қилган. Унда Омар Си гўёки жонли эфирга қўнғироқ қилиб тушган тингловчини тасвирлаган. Мактабни якунлагач, Омар продюсерлик компаниясидан актёр Фред Тесто билан биргаликда «Омар ва Фред» шоусини ўтказиш таклифини олган. Сўнгра «Жаҳаннам осмонўпар биноси» комедиясида эпизод ролни ижро этган. Кўп ўтмай энг машҳур француз фильми «Астерикс ва Обеликс. Клеопатра миссияси» картинасида ҳам иштирок этган. Аммо унга муваффақият келтиргани «1+1» фильмидаги Дрисс роли бўлди. Айнан ушбу комедия учун у «Цезарь» мукофотини қўлга киритган. Ўшандан буён актёр 50 дан ортиқ фильмларда суратга тушди. Комик ҳамда драматик актёр сифатида шуҳрат қозонди.
Унинг 7 ака-ука ва опа сингиллари бор
Омар саккиз фарзанднинг тўртинчиси. Миллати бўйича Омар фульбе халқига мансуб, динига кўра мусулмон. Онаси Мавританиядан, отаси эса Сенегалдан. Улар камбағал муҳожирлар бўлиб, фарзандлари таълим олиши учун жуда кўп меҳнат қилган. Шунинг учун Омар мактабдан қолишни тасаввур қила олмасди. Омар баъзи маҳаллийлардан ҳам кўра французчада яхши гапириши ажабланарли эмас. Тўғри, у ҳеч қачон ота-онаси орзу қилган кондиционер созлагич касбини ўзлаштирмаган, чунки унинг фикри-хаёли кино оламида эди. «Муҳожирларнинг фарзанди ҳар доим ўзларини уйдагидек ҳис қила олмасликлари табиий ҳол. Чунки ўзга жойда доим бегона одам сифатида қабул қилинади. Ва бундай ҳолатда иккита танлов пайдо бўлади: ё ўзингизни ҳеч қаерда ҳис қилмайсиз, ёки аксинча, сизнинг уйингиз ҳамма жойда. Мен иккинчи вариантни танладим, қаерга борсам ҳам ҳамма жойда ўзимни яхши ҳис қиламан», − дейди актёр.
Францияда Зинедин Зидандан кейинги энг машҳур одам
Французлар актёрларни энг севимли киши сифатида тан олади. Бундай илтифотга жавобан Омар шундай дейди: «Мен бундай муҳаббат учун жуда ҳам миннатдорман. Аммо бунга лойиқманми ёки йўқ, билмайман. Ушбу ишончни оқлашга қаттиқ ҳаракат қиламан».
Актёр Бирма муҳожирларига ёрдам бериш учун икки миллион евро йиғди
Омар Си хайрия ишларида ҳам жуда фаол. У Францияда яшовчи муҳожирларга ҳам ёрдам кўрсатади. У яқинда қочоқлар лагерини қуриш учун икки миллион евро йиғди. Муҳожир мавзуси актёрни ҳеч қачон тарк этмайди. Яқинда унинг отаси ҳақидаги Сенелгалда суратга олинган «Яо» фильми намойиш этилди. Актёр фильмда продюсер сифатида ҳам ишлаган.
10 йиллик муносабатдан кейин уйланган
Омар Элен билан коллежда ўқиётган вақтида танишган. У дўстининг қўшниси бўлган. Дастлаб улар шунчаки дўст бўлган. Лекин Омар кутишни афзал билган. Ота-онаси фақат қора танли қизни келини сифатида кўришни хоҳлашига қарамай, бўлажак актёр 20 ёшида уйидан чиқиб кетиб, Элен билан яшай бошлаган. Фақатгина 10 йиллик фуқаролик никоҳи ҳамда уч фарзанддан кейин Омар севгилисига турмушга чиқиш таклифини билдирган. Элен нафақат меҳрибон рафиқа, балки актёрнинг энг қийин дамларида, пули йўқ ёки омади келмаган пайтда қўллаб-қувватловчи содиқ шерик бўлиб чиқди. Унга радио бошловчиликни таклиф этишганида, унга ишонч билдирган ягона одам ҳам унинг хотини эди. Ижтимоий тармоқларда Элен доим у ҳақда ҳайрат билан ёзади, гўёки у билан кеча учрашгандек. Ҳозирда жуфтликнинг 5 та фарзанди бор. Улар 20 йилдан буён бахтли ҳаёт кечириб келмоқда. Элен Си 2004 йилда турли касалликларга чалинган болаларни даволаш ва реабилитацияси учун маблағ йиғадиган хайрия фондини ташкил этган.
Жуфтлик ҳеч қачон фарзандларини оммага кўрсатмайди
Омарнинг 5 нафар фарзанди бор. Аммо улар ҳеч қачон болаларининг суратини намойиш қилмайди ва ижтимоий тармоқлардан фақат хайрия лойиҳалари учун фойдаланади. Жуфтлик Facebook ва Instagram’ни болаларнинг вақтини ўғирлайдиган душман, деб билади. Актёрнинг шахсий ҳаёти ёпиқ ҳудуд. Ҳаттоки, фильмларнинг бирини суратга олиш учун бутун оиласи билан Калифорнияга кўчиб ўтганида ҳам папараццилар уларни суратга ололмаган.
Овқат пиширишни яхши кўради
Юлдуз меҳмон кутишни жуда ҳам яхши кўради. У ҳатто ўзини таом пиширишда мутахассис деб билади. Шунингдек, Италия ошхонасини ёқтиради. Ширинликлардан эса шоколадни севиб истеъмол қилади.
«1+1» фильмидаги «Earth, Wind & Fire» гуруҳининг қўшиғини жуда яхши кўради
Ушбу қўшиқнинг фильмда пайдо бўлишининг сабаби бор. Режиссёр ундан қайси қўшиқ унинг кўнглини кўтариб, рақсга тушишга ундашини сўраган. Омар иккиланмасдан «September» қўшиғини айтган. «Болалигимда акаларим «Earth, Wind & Fire» ва «Kool and the Gang» гуруҳларини тинглар эди. Уларнинг хонасига кирмоқчи бўлсам, бу болалар эшитадиган қўшиқ эмас, деб эшикни беркитиб қўярди. Энди эса бу қўшиқдан хоҳлаган вақтда завқланишим мумкин», − дейди актёр.
Изоҳ (0)