Хонанда Шаҳзоданинг кинодаги энг ёрқин образлари (видео)

Эстрада хонандаси Шаҳзода – Зилола Мусаева бир неча йиллардан буён ўз қўшиқлари билан мухлислар кўнглини шод этиш билан бирга, ранг-баранг роллари билан актрисалик маҳоратини ҳам намоён қилиб келмоқда. Қуйида унинг фильмдаги энг эсда қоларли образлари санаб ўтилади.

«Севинч» – Наргиз

Фильм хонанда Лола Йўлдошева ижро этган образ – саратон касаллигига чалинган Севинч исмли қизнинг ҳаёти ҳақида ҳикоя қилади. Ушбу картинада Шаҳзода унинг энг яқин дугонаси, Дониёрни севиб қолган бой қиз – Наргизни ижро этган. Шу вақтгача Шаҳзода хонанда сифатида танилган бўлса, ушбу фильмдан кейин мухлислар уни актриса сифатида ҳам тан олди.

«Фотима ва Зуҳра» – Зуҳра

Ушбу картинада хонанда эгизакларнинг бири – Зуҳра образида намоён бўлган. Ёш бўлишига қарамай, оиласида юз берган фожиалар туфайли опаси Фотима ўз жонига қасд қилади. Отаси ҳамда акасидан айрилган Зуҳра ҳақиқат учун курашади. Ўзбек фильмлари орасида классикага айланган мазкур картинани ҳанузгача одамлар завқ билан томоша қилмоқда.

«Зумрад ва Қиммат» – Зумрад

Шаҳзода ижро этган образларнинг аксарияти катта қийинчиликка дуч келади. «Зумрад ва Қиммат» фильмида ҳам шундай, икки қизи бор ўгай она, бева қолган ота ва хизматкор Зумрад. Фильмда қаҳрамон ўз бахти учун ўзи курашиши керак бўлади ва бу йўлда бир қанча тўсиқларни енгиб ўтади.

«Мажруҳ» – Севара

Оғир касаллик туфайли севгилиси ташлаб кетган Севара ўз жонига қасд қилади. Аммо доимий воқеаларга кўра, охирги дақиқаларда уни Фарруҳ – Улуғбек Қодиров қутқаради. Ўзи ноҳақ айблов туфайли қамалиб чиққан бўлса-да, қизни бахтли қилиш учун сохта тўй қилишга қарор қилади. Аммо жуфтлик олдинда ажойиб воқеалар кутиб турганидан бехабар эди.

«О Марям, Марям» – Марям

Мазкур картинада Шаҳзода ижро этган Марям исмли қизнинг тақдиридан ҳикоя қилади. Воқеа қамоқхонадан бошланади. Марям воқеалар давомида психологга қандай қилиб бу нуқтага келганини айтиб беради. Болалигидан отасиз улғайиши, онасидан айрилиши, эрта турмуш, фарзандсизлик ва ниҳоят турмуш ўртоғининг қотилига айланиш каби воқеалар Марям образи атрофида айланади.