Fransiyaning eng yuqori mukofoti − “Sezar”ni olgan birinchi qora tanli aktyor, besh farzandning baxtli otasi, prodyuser, jamoat arbobi va eng nufuzli va mashhur odamlaridan biri. Butun dunyo uning “1+1” filmidagi Driss obrazi orqali yaxshi ko‘rib qolgan. Aktyor go‘yoki ushbu filmda o‘zini ijro etganga o‘xshaydi. Xo‘sh, Fransiyaning eng mashhur aktyori haqida nimalar ma’lum?
Aktyorning karyerasi yolg‘ondan boshlangan
Birinchi marta Omar maktab o‘quvchisi sifatida mashhur komik aktyor Jemal Debuzning Radio Nova shou-dasturida chiqish qilgan. Unda Omar Si go‘yoki jonli efirga qo‘ng‘iroq qilib tushgan tinglovchini tasvirlagan. Maktabni yakunlagach, Omar prodyuserlik kompaniyasidan aktyor Fred Testo bilan birgalikda “Omar va Fred” shousini o‘tkazish taklifini olgan. So‘ngra “Jahannam osmono‘par binosi” komediyasida epizod rolni ijro etgan. Ko‘p o‘tmay eng mashhur fransuz filmi “Asteriks va Obeliks. Kleopatra missiyasi” kartinasida ham ishtirok etgan. Ammo unga muvaffaqiyat keltirgani “1+1” filmidagi Driss roli bo‘ldi. Aynan ushbu komediya uchun u “Sezar” mukofotini qo‘lga kiritgan. O‘shandan buyon aktyor 50 dan ortiq filmlarda suratga tushdi. Komik hamda dramatik aktyor sifatida shuhrat qozondi.
Uning 7 aka-uka va opa singillari bor
Omar sakkiz farzandning to‘rtinchisi. Millati bo‘yicha Omar fulbe xalqiga mansub, diniga ko‘ra musulmon. Onasi Mavritaniyadan, otasi esa Senegaldan. Ular kambag‘al muhojirlar bo‘lib, farzandlari ta’lim olishi uchun juda ko‘p mehnat qilgan. Shuning uchun Omar maktabdan qolishni tasavvur qila olmasdi. Omar ba’zi mahalliylardan ham ko‘ra fransuzchada yaxshi gapirishi ajablanarli emas. To‘g‘ri, u hech qachon ota-onasi orzu qilgan konditsioner sozlagich kasbini o‘zlashtirmagan, chunki uning fikri-xayoli kino olamida edi. “Muhojirlarning farzandi har doim o‘zlarini uydagidek his qila olmasliklari tabiiy hol. Chunki o‘zga joyda doim begona odam sifatida qabul qilinadi. Va bunday holatda ikkita tanlov paydo bo‘ladi: yo o‘zingizni hech qayerda his qilmaysiz, yoki aksincha, sizning uyingiz hamma joyda. Men ikkinchi variantni tanladim, qayerga borsam ham hamma joyda o‘zimni yaxshi his qilaman”, − deydi aktyor.
Fransiyada Zinedin Zidandan keyingi eng mashhur odam
Fransuzlar aktyorlarni eng sevimli kishi sifatida tan oladi. Bunday iltifotga javoban Omar shunday deydi: “Men bunday muhabbat uchun juda ham minnatdorman. Ammo bunga loyiqmanmi yoki yo‘q, bilmayman. Ushbu ishonchni oqlashga qattiq harakat qilaman”.
Aktyor Birma muhojirlariga yordam berish uchun ikki million yevro yig‘di
Omar Si xayriya ishlarida ham juda faol. U Fransiyada yashovchi muhojirlarga ham yordam ko‘rsatadi. U yaqinda qochoqlar lagerini qurish uchun ikki million yevro yig‘di. Muhojir mavzusi aktyorni hech qachon tark etmaydi. Yaqinda uning otasi haqidagi Senelgalda suratga olingan “Yao” filmi namoyish etildi. Aktyor filmda prodyuser sifatida ham ishlagan.
10 yillik munosabatdan keyin uylangan
Omar Elen bilan kollejda o‘qiyotgan vaqtida tanishgan. U do‘stining qo‘shnisi bo‘lgan. Dastlab ular shunchaki do‘st bo‘lgan. Lekin Omar kutishni afzal bilgan. Ota-onasi faqat qora tanli qizni kelini sifatida ko‘rishni xohlashiga qaramay, bo‘lajak aktyor 20 yoshida uyidan chiqib ketib, Elen bilan yashay boshlagan. Faqatgina 10 yillik fuqarolik nikohi hamda uch farzanddan keyin Omar sevgilisiga turmushga chiqish taklifini bildirgan. Elen nafaqat mehribon rafiqa, balki aktyorning eng qiyin damlarida, puli yo‘q yoki omadi kelmagan paytda qo‘llab-quvvatlovchi sodiq sherik bo‘lib chiqdi. Unga radio boshlovchilikni taklif etishganida, unga ishonch bildirgan yagona odam ham uning xotini edi. Ijtimoiy tarmoqlarda Elen doim u haqda hayrat bilan yozadi, go‘yoki u bilan kecha uchrashgandek. Hozirda juftlikning 5 ta farzandi bor. Ular 20 yildan buyon baxtli hayot kechirib kelmoqda. Elen Si 2004-yilda turli kasalliklarga chalingan bolalarni davolash va reabilitatsiyasi uchun mablag‘ yig‘adigan xayriya fondini tashkil etgan.
Juftlik hech qachon farzandlarini ommaga ko‘rsatmaydi
Omarning 5 nafar farzandi bor. Ammo ular hech qachon bolalarining suratini namoyish qilmaydi va ijtimoiy tarmoqlardan faqat xayriya loyihalari uchun foydalanadi. Juftlik Facebook va Instagram’ni bolalarning vaqtini o‘g‘irlaydigan dushman, deb biladi. Aktyorning shaxsiy hayoti yopiq hudud. Hattoki, filmlarning birini suratga olish uchun butun oilasi bilan Kaliforniyaga ko‘chib o‘tganida ham paparatssilar ularni suratga ololmagan.
Ovqat pishirishni yaxshi ko‘radi
Yulduz mehmon kutishni juda ham yaxshi ko‘radi. U hatto o‘zini taom pishirishda mutaxassis deb biladi. Shuningdek, Italiya oshxonasini yoqtiradi. Shirinliklardan esa shokoladni sevib iste’mol qiladi.
“1+1” filmidagi “Earth, Wind & Fire” guruhining qo‘shig‘ini juda yaxshi ko‘radi
Ushbu qo‘shiqning filmda paydo bo‘lishining sababi bor. Rejissor undan qaysi qo‘shiq uning ko‘nglini ko‘tarib, raqsga tushishga undashini so‘ragan. Omar ikkilanmasdan “September” qo‘shig‘ini aytgan. “Bolaligimda akalarim “Earth, Wind & Fire” va “Kool and the Gang” guruhlarini tinglar edi. Ularning xonasiga kirmoqchi bo‘lsam, bu bolalar eshitadigan qo‘shiq emas, deb eshikni berkitib qo‘yardi. Endi esa bu qo‘shiqdan xohlagan vaqtda zavqlanishim mumkin”, − deydi aktyor.
Izoh (0)