Шавкат Мирзиёевнинг Бухоро шаҳридаги давлат хизматлари маркази ва IT Park’га ташрифи — суратларда

Аввал хабар берилганидек, Шавкат Мирзиёев Бухоро вилоятига амалга оширган расмий ташрифи давомида Бухоро шаҳридаги давлат хизматлари маркази ва IT Park’га ташриф буюрди. 

«Дарё» мухбири давлат раҳбарининг ушбу ҳудудга ташрифи ва у ердаги иш жараёнларидан тайёрланган фотолавҳаларни тақдим этди.

Давлат хизматлари маркази 

Бухоро шаҳар, Баҳоуддин Нақшбанд кўчасида жойлашган ахборот-ресурс марказининг 3528 квадрат метрдан иборат 2 қаватли биноси Давлат хизматлари агентлиги Бухоро вилоят бошқармасига берилган. Мазкур бино 15 миллиард сўм маҳаллий бюджет маблағлари ҳисобидан реконструкция қилинган.

Бугунги кунда мазкур марказда 130 дан ортиқ турдаги давлат хизматлари кўрсатилмоқда. Бинода 46 та хона бўлиб, аҳоли ва тадбиркорларга хизмат кўрсатувчи банк филиали, инвесторлар хонаси ва бошқа қўшимча хоналар мавжуд. Бу ерда Давлат хизматлари агентлиги вилоят бошқармаси, Бухоро шаҳар давлат хизматлари маркази, Тадбиркорлар мурожаатларини кўриб чиқиш бўйича вилоят ва шаҳар қабулхоналари, Бухоро шаҳар Халқ қабулхонаси, Бухоро шаҳар 1-сон ФҲДЁ бўлими, Бухоро шаҳар 2-сон нотариал идораси ҳамда давлат хизматларини кўрсатувчи давлат органлари ҳамда бошқа ташкилотлар вакиллари фаолият юритади.

Давлат хизматларидан фойдаланувчиларга электрон навбат асосида хизмат кўрсатилади. Бинога ташриф буюрувчилар учун қўшимча қулайликлар яратиш мақсадида бино, кутиш зали, лифт ва эскалатор билан таъминланган. Кутувчиларни бўш вақтидан унумли фойдаланиш мақсадида кутиш залида китоблар жавони ташкил этилган. Марказда 67 нафар ходим фаолият олиб боради.

IT-Park мажмуаси

Бу ерда ҳам ўқувчилар, ҳам талабалар, ҳам фрилансер ва дастурчилар учун зарур шароитлар яратилган. Болалар мактаб давридан ўйинлар орқали ахборот технологияларига қизиқтирилади, кейин ўқитилиб, лойиҳалар ишлаб чиқишга ўргатилади. Бу ерда ёш ҳаваскорлар, робототехниклар, веб-дизайнерлар, профессионал дастурчилар йиғилган.

IT-Park мажмуаси бугунги кунда вақтинчалик бинода, яъни Давлат хизматлари марказининг иккинчи қаватида фаолият олиб бормоқда. 2022 йилда IT-Park учун алоҳида бино фойдаланишга топширилиши кўзда тутилмоқда.

Бухоро шаҳри, Bukhara City замонавий ишбилармонлик ва турар жойлар марказида «77-ЛОТ» доирасида 2 та блокдан иборат IT-Park комплексини барпо этиш ишлари буюртмачи ва инвестор «Бухоро Агрокластер» масъулияти чекланган жамиятга тегишли. Лойиҳачи Vertebra Omurga Mimarlık İnşaat Restorasyon Ve Planlama San. Ve Tic.Ltd.Şti. номли Туркия компанияси саналади. Лойиҳа қиймати қарийб 13,1 миллион еврони ташкил этади.  Янги IT-Park комплекси умумий майдони 14,4 минг метр квадрат, бинолари 9 ва 12 қаватли бўлиб, меҳмонхона, ресторан, коворкинг маркази, офислар, дам олиш хонаси ва спорт залларини ўз ичига олади.

IT-Park қуйидаги йўналишларга ихтисослашади:

- инкубация ва акселерация дастурлари;

- давлат ва хусусий венчур жамғармалари;

- халқаро стандартлардаги IТ-академия;

- замонавий жиҳозли, қулай иш ўринлари ва IТ-муҳит;

- юридик, бухгалтерия ва маркетинг соҳаларида кўмак.

Бугунги кунда объектда ер қазиш (котлован) ва тупроқни мустаҳкамлаш ҳамда свай ўрнатиш ишлари олиб борилмоқда.