Honor компанияси V40 моделини тақдим этди: Huawei’сиз биринчи смартфон

Honor бренди АҚШ санкциялари қўлланилмайдиган ўзининг V40 моделини тақдим этди, деб хабар беради Hi-Tech.Mail.ru.

2020 йил Huawei учун қийин келди — у кўплаб хорижий шерикларидан узиб қўйилди, шу сабабли янги смартфонлари Google сервисларисиз чиқаётган эди. Ноябрда компания санкциялардан қочиш учун Honor шўъба брендини хитойлик инвесторлар гуруҳига сотишга қарор қилди.

Орадан икки ой ўтгач, мустақил компания ўзининг биринчи смартфони — Honor V40’ни тақдим этди.

Honor V40 Huawei билан биргаликда яратилган бўлиши мумкин, чунки ундаги ўзидан олдинги моделларга хос чизгилар кўзга яққол ташланади. Мазкур флагманга четлари эгилган 6,72 дюймли дисплей, шишали қопқоққа эга корпус ва ноодатий жойлашган камералар модули ўрнатилган.

Дисплей учун Full HD+ сифатни қўллаб-қувватловчи 120 герц янгиланиш частотасига эга OLED-матрицадан фойдаланилган. Қурилма MediaTek Dimensity 1000+ процессорида ишлайди — афтидан, Kirin чипларидан бошқа фойдаланиш мумкин эмас. Орқа томонига асосий модули 50 мегапикселга тенг, 1/1,56 дюймли сенсорга эга тўртта камера ўрнатилган.

Аккумулятор сиғими 4000 мА/соат бўлиб, симли 66 ватт ва симсиз 50 ваттли тезкор қувватланишга эга.

Хитойда Honor V40 (8/128 гигабайт) 3599 юандан (555 доллар) сотувга чиқади.