“Muhimi, buxoroliklarni yaxshi ko‘radi”. Buxoro viloyati rahbari Botir Zaripovning lavozimidan “vazifasini bajaruvchi” qo‘shimchasi olib tashlandi

Botir Zaripov Buxoro viloyati hokimi lavozimiga tasdiqlandi. U 2020-yil 7-noyabridan beri Buxoro viloyati hokimi vazifasini bajaruvchi sifatida ishlab kelayotgan edi.

22-yanvar kuni xalq deputatlari Buxoro viloyati kengashining navbatdan tashqari 25-sessiyasi bo‘lib o‘tgan. Prezident Shavkat Mirziyoyev ishtirok etgan sessiyada tashkiliy masala ko‘rilgan, davlat rahbari Botir Zaripovni viloyat hokimi lavozimiga tavsiya qilgan. “Balki Zaripov bunday vazifaga tayyor emasdir, lekin unda ishtiyoq bor, ishlashga harakat bor. Men uni 3 oydan beri sinayapman. Rozi bo‘lsalaring uni hokim qilib saylaymiz va birgalikda ishlaymiz”, — deb aytgan prezident.

Tavsiya etilgan nomzod viloyat kengashi deputatlari tomonidan bir ovozdan qo‘llab-quvvatlangan. “Daryo” muxbiri Musulmonbek Ibrohimovning xabar berishicha, prezident Shavkat Mirziyoyev Buxoro viloyati hokimi lavozimiga tasdiqlangan Botir Zaripov haqida fikr bildirarkan, uni: “Buxoroning sho‘r suvini, shamolini yutib katta bo‘lgan kadr. Avvalgi ishlagan joyida yo‘q bo‘lgan sohani to‘rt yilda bor qildi. Hokim bo‘lish oson emas. Eng muhimi, buxoroliklarni yaxshi ko‘radi”, deb ta’riflagan.

Botir Zaripov 1969-yil 20-noyabrda G‘ijduvon tumanida tug‘ilgan. 1997-yilda Toshkent moliya institutini tamomlagan. 1997—1998-yillarda Milliy bankning Buxoro bo‘linmasi Yuridik va jismoniy shaxslarni kreditlashtirish bo‘limi boshlig‘i, 1998-yilda Milliy bankning Buxoro bo‘linmasi Qorovulbozor filiali qurilishi boshlig‘i, 1998—2005-yillarda Milliy bankning Buxoro bo‘linmasi Qorovulbozor filiali boshqaruvchisi lavozimlarida ishlagan.

2005—2006-yillarda Markaziy bankning Buxoro viloyati bosh boshqarmasi boshlig‘ining birinchi o‘rinbosari — Inkassatsiya boshqarmasi boshlig‘i, 2006-yilda Markaziy bankining Buxoro viloyati bosh boshqarmasi boshlig‘ining birinchi o‘rinbosari, 2006—2008-yillarda Milliy bankning Buxoro bo‘linmasi boshqaruvchisi, 2008—2012-yillarda Markaziy bank boshqaruvi raisining o‘rinbosari, 2012—2013-yillarda Markaziy bank Nobank kredit tashkilotlarini nazorat qilish va tartibga solish departamenti direktori, 2013—2015-yillarda Markaziy bank Kredit tashkilotlari faoliyatini litsenziyalash va tartibga solish departamenti direktori sifatida mehnat qilgan.

Botir Zaripov 2015—2016-yillarda “Agrobank” boshqaruvi raisining birinchi o‘rinbosari, 2016—2019-yillarda “O‘zqurilishmateriallari” kompaniyasi boshqaruvi raisi, 2019—2020-yillarda esa yangidan tashkil etilgan “O‘zsanoatqurilishmateriallari” uyushmasi boshqaruvi raisi lavozimlarida ishlagan. Zaripov O‘zbekiston mustaqilligining 29 yilligi munosabati bilan prezident farmoniga ko‘ra “Sodiq xizmatlari uchun” medali bilan taqdirlangan.