Наманган вилоятининг Мингбулоқ туманида 22 январь, жума куни содир бўлган кучли шамол бир қатор бинолар томи ва айрим қурилмаларга зарар етказди.
Хусусан, шамол таъсирида туман маркази — Жомашуй шаҳарчасидаги маҳалла ва оилани қўллаб қувватлаш бўлими маъмурий биноси томи учиб кетиб, электр симларининг узилишига сабаб бўлган. Ушбу бино 2019 йилда таъмирланган бўлган. Ҳодиса оқибатида ҳеч ким жабрланмаган.
Шунингдек, кучли шамол «Тунги ёғду» савдо мажмуаси ёнидаги кўп қаватли уйларнинг томини ҳам учириб кетган. Янги қурилган бинонинг олд қисми қулаб тушган.
Қайд этилишича, воқеа жойига маҳаллий ҳокимият ва фавқулодда хизматлар бўлими етиб келиб, ҳолат юзасидан тезкор штаб тузилди. Айни пайтда шамол оқибатларини бартараф этиш чора-тадбирлари амалга оширилмоқда.
Мутасаддилар фуқароларни зарурий ҳолатларда кўчага чиқмаслик, фарзандларини ёлғиз қолдирмаслик ҳақида огоҳлантирган.
Аввалроқ Андижонда ҳам қор бўрони сабаб юзага келган кўнгилсиз ҳодисалар юз бергани маълум қилинганди. Хусусан, Андижон шаҳридаги «Рубоий» кафеси олдидаги реклама баннери устуни шамолда эгилиб кетган. Бундан ташқари, Боғишамолдаги эски машина бозоридаги дўконнинг томи учиб кетиб, Damas устига қулаган, Шаҳрихонда «Ватанпарвар» ташкилотининг томи шамолда учиб кетиб, Espero ва Damas’ни босиб қолган, Асакада бодринг экилган иссиқхоналарнинг плёнкаси учиб кетган.
«Ўзгидромет» Ўзбекистонда ҳафтанинг иккинчи ярмидан шамол тезлиги кучайиб, қор ёғишини, шамол тезлиги 17—22 метр/секундни ташкил этиши, баъзи жойларда 25—28 метр/секундгача етишини маълум қилганди. Тошкент ИИББ пойтахтда кучли шамол бўлиши кутилаётгани сабабли аҳолини огоҳлантирганди.
Мавзуга доир: Фото: Ўзбекистонга қор бўрони ёпирилди
Изоҳ (0)