Ўрта Чирчиқда ҳокимлик ходими пичоқланди. Ҳолат юзасидан жиноят иши қўзғатилган

Тошкент вилоят прокуратураси Ўрта Чирчиқ тумани ҳокимлиги ходимига тан жароҳати етказилганлиги юзасидан расмий баёнот берди.

Маълум қилинишича, Ўрта Чирчиқ туманида яшовчи Б.А. исмли фуқаро 19 январь куни низоли хонадонга туман ҳокимининг эгалик ҳуқуқи бериш ҳақидаги қарори қабул қилинмаётгани, бунга туман ҳокимлиги ходими Т.С. тўсқинлик қилаётгани важидан у билан ўзаро жанжаллашиб қолган. Жанжал вақтида Б.А. ўзи билан олиб келган ошхона пичоғини унинг қорин қисми ва чап оёғи сон қисмига уриб, тан жароҳати етказган.

Мазкур ҳолат юзасидан 19 январь куни туман прокуратураси томонидан Жиноят кодексининг 104-моддаси (қасддан баданга оғир шикаст етказиш) 2-қисми «б, л» бандлари билан жиноят иши қўзғатилиб, гумон қилинувчи Б.А. Жиноят-процессуал кодекс талаблари асосида ушланган.

Ҳозирда Ўрта Чирчиқ туман прокуратураси томонидан дастлабки тергов ҳаракатлари олиб борилмоқда.

Аввалроқ Бекободда маст эркак у билан саломлашмаган танишига пичоқ ургани, Андижонда қўшни аёлни қарз бермагани ва устидан кулгани учун ўлдирган шахс 17,5 йилга қамалгани тўғрисида хабар берилганди.