Россиянинг Нью-Йоркдаги бош консуллигидаги барча телефон линиялари узилиб қолган. Шу билан бирга, интернет ва уяли алоқа билан боғлиқ муаммолар мавжуд. Бу ҳақда Meduza хабар қилмоқда.
«Барча шаҳар телефон линиялари бутунлай узилган. Бундай ҳолат илгари ҳеч қачон бўлмаган», – деб хабар қилди бош консуллик «ТАСС»га.
«РИА Новости» манбасининг таъкидлашича, Америка томони техник муаммолар туфайли бундай бўлганини айтмоқда.
«Улар икки кун давомида муаммони ҳал қила олмади. Бу ҳеч қачон содир бўлмаган. Биздаги бир эмас, икки эмас, балки жуда кўп линиялар шундай ҳолатда. Ва барчаси бирданига ўчириб қўйилгандек», – деди агентлик манбаси.
Россиянинг Нью-Йоркдаги бош консуллиги 1994 йилда очилган. У Манхэттен марказида 91-кўчада жойлашган бўлиб, Коннектикут, Иллинойс, Индиана, Мен, Массачусетс, Мичиган, Миннесота, Ню-Хемпшир, Нью-Жерси, Нью-Йорк, Огайо, Пенсильвания, Род-Айленд, Вермонт ва Висконсин штатларида яшайдиган Россия фуқароларига консуллик хизматларини тақдим этади.
Аввалроқ россиялик хакерлар АҚШ молия вазирлиги тизимига ҳужум уюштиргани ҳамда Жо Байден Россияни АҚШ учун асосий хавф деб атагани ҳақида хабар берилганди.
Мавзуга доир:
- АҚШ Россияни Навальнийнинг заҳарланиши борасида фитна назарияларини яратишда айблади. АҚШ янги санкцияларни тайёрлаётгани хабар берилди
- АҚШ Давлат котиби БМТ Инсон ҳуқуқлари бўйича Кенгаши аъзоси сифатида Россия, Хитой ва Кубанинг сайланишини қоралади
- Эдвард Сноуден Америка паспортини сақлаган ҳолда Россия фуқаролигини олишга қарор қилди
Изоҳ (0)