Ногиронлар аравачасига михланган гонконглик собиқ алпинист Лай Чи-вай умуртқасида жароҳати бор инсонларни қўллаб-қувватлаш мақсадида арқон ёрдамида осмонўпар бинога кўтарилди, деб хабар беради Esquire.

Фото: Legion Media

37 ёшли спортчи 250 метр баландликка 10 соатдан ортиқ вақт давомида кўтарилган, бино томига 50 метр қолганида хавфсизлик нуқтаи назаридан унинг ҳаракати тўхтатилган. Гонконглик эркак ушбу хайрия акцияси давомида 5,2 миллион Гонконг доллари (670 минг АҚШ доллар) тўплашга муваффақ бўлган.

Лай Чи-вай жуда ҳам қўрққанини тан олган, чунки арқон у ишониши мумкин бўлган ягона восита эди. Собиқ алпинистнинг айтишича, мазкур акция орқали у муҳтожларга нафақат ёрдам беришни, балки имконияти чекланган одамларнинг ҳиссиётларига эътибор қаратишни хоҳлаган. Унинг фикрича, бу каби одамларга раҳм-шафқат керак эмас — уларга намуна бўладиган инсон ва умид керак.

«Қайсидир маънода ногиронлигимни унутдим, мен ҳамон ўзимга ёққан нарсани орзу қила оламан ва уни бажаришим мумкин», — дейди Лай Чи-вай.

Лай қояга чиқиш бўйича тўрт карра Осиё чемпиони, бир сафар у жаҳон рейтингида саккизинчи ўринни ҳам эгаллаган. Бироқ 2011 йилда у ЙТҲга учраб, ногиронлар аравачасига михланган. Шунга қарамай, спортчи тушкунликка тушмаган ва орадан бироз вақт ўтгач махсус арқонлар тизими ёрдамида қояларга чиқишни давом эттирган. Бундан 5 йил олдин Лай Чи-вай 495 метр баландликка эга тоққа чиқан эди.