2018 йилда Седзи Моримото профессионал бекорчи сифатида «ишга жойлашган». Esquire’нинг ёзишича, 2,5 йиллик фаолияти давомида у 30 миллион иена (290 минг доллар) ишлаб топган.
37 ёшли Седзи шунчаки пул учун одамлар билан вақт ўтказади. Шу билан бирга, у ҳеч қандай ўзига хослик ҳақида ваъда бермайди — у шунчаки келади, овқатланади, оддий маслаҳатлар беради, бир сўз билан айтганда, ҳамроҳлик қилади. Ҳозирда Моримотонинг хизмати 10 минг иена туради. Бундан ташқари, унинг транспорт ва овқатлари харажати учун ҳам тўлаш керак.
Барчаси Моримото кунларнинг бирида Twitter’да пост қолдирганидан сўнг бошланган.
«Мен ўзимни ҳеч қандай иш қилмайдиган инсон сифатида ижарага тақдим этаман. Дўконга бир ўзингиз боришга қийналяпсизми? Жамоада ўйинчи етмаяптими? Сиз учун ўрин эгаллайдиган инсон керакми? Мен енгил вазифалардан бошқасини қила олмайман», — деб ёзган у ўз тивитида.
Натижада Седзининг хизматлари машҳурликка эришиб, уч минг маротабадан ортиқ фойдаланилган.
Аввалига у буларнинг барчасини бепул қилган, бироқ вақт ўта бошлагач сўровларни камайтириш мақсадида хизмат ҳақи ола бошлаган. Одатда у бир кунда 3—4 нафар мижоз билан кўришади.
Моримотонинг сўзларига кўра, унга турли одамлар мурожаат қилади. Айримлар ёлғизликдан азият чекса, баъзилари зерикканидан. Уни тушлик қилиш учун, Instagram’га суратга тушиш, боғда капалак тутиш, тиббиёт ходимининг оғир меҳнати тўғрисидаги гапларни эшитиш, ажрашаётган одамга ҳамроҳлик қилиш учун ёллашган.
Бир инсон Седзини содир этган қотиллиги тўғрисида сўзлаб бериш учун ёллаган бўлса, бошқа бир киши ундан ўз жонига қасд қиладиган жойга олиб боришни сўраган.
Моримотонинг ўзи оила қурган, олий маълумотли ва физика бўйича олимлик даражасига эга. «Бекорчилик» карьерасига қадар у нашриётда ишлаган.
Изоҳ (0)