Qashqadaryo viloyatining Dehqonobod tumanida yashovchi fuqaro xonadonidagi otxona devorlarini buzayotganda otasidan qolgan miltiqni topib olgan. Bu haqda “Daryo”ga tuman IIB boshlig‘i o‘rinbosari Dilshod Mirzayev ma’lum qildi.
Dilshod Mirzayevning ma’lumot berishicha, qurol tumanning Nayman qishlog‘ida yashovchi fuqaro xonadonidan topilgan.
“Tuman IIBga 2021-yil 14-yanvar kuni kelib tushgan xabarga ko‘ra, viloyat IIB TEQKB TChH Kamar TB boshlig‘i mayor F.Sharipov, tuman IIB HPB boshlig‘i mayor Sh.Hakimov, tuman IIB HPB profilaktika inspektori katta leytenanti B.Mallayevlar tomonidan olib borilgan tushuntirish va targ‘ibot tadbirlari davomida Dehqonobod tumanining ‘Ingichka’ MFY Nayman qishlog‘ida yashovchi fuqaro otxonasining devorini buzayotgan vaqtida marhum otasidan qolgan miltiqni topib olgan”, — deydi Dilshod Mirzayev.
Aytilishicha, fuqaroning otasidan (1921—1989-yillarda yashagan) 1 dona, 1 nilli, 16 kalibrli, ishlab chiqarilgan sanasi noaniq bo‘lgan o‘qotar ov quroli qolgan. O‘g‘il otadan qolgan qurolni topib olgach, o‘z ixtiyori bilan tuman IIBga topshirgan.
Eslatib o‘tamiz, Jinoyat kodeksining 248-moddasiga muvofiq qurolni, patronlarni, o‘q-dorilarni, portlovchi moddalarni va portlatish qurilmalarini o‘z ixtiyori bilan topshirgan jismoniy va yuridik shaxs qonun hujjatlarida belgilangan javobgarlikdan ozod qilinadi.
Shuningdek, Vazirlar Mahkamasining “Ro‘yxatga olinmagan qurolni, patronlarni, o‘q-dorilarni, portlovchi moddalarni va portlatish qurilmalarini ichki ishlar organlariga o‘z ixtiyori bilan topshirish tartibi to‘g‘risidagi nizomni tasdiqlash haqida”gi qaroriga ko‘ra, jismoniy yoki yuridik shaxs ichki ishlar organlariga qurol va (yoki) ularning o‘q-dorilarini o‘z ixtiyori bilan topshirganligi uchun pul mukofoti bilan taqdirlanishi, 1974-yilgacha ishlab chiqarilgan fuqaroviy o‘qotar qurol topshirgan jismoniy shaxs esa uni imtiyozli olish huquqiga ega bo‘lishi mumkin.
Izoh (0)