Ижтимоий тармоқларда андижонлик боланинг ҳокимларга таъмирталаб кўприкни тўғрилаб қўйишни сўраб йўллаган мурожаати эълон қилинди. Видеодаги суҳбатдан аён бўлишича, воқеа Асака шаҳрининг Амир Темур кўчасида жойлашган кўприк устида тасвирга олинган.
«Дарё» мухбири Асака шаҳрида бўлиб, мутасаддилар билан шу масалада суҳбатлашди.
Маълум қилинишича, кўприк Асака шаҳрининг Амир Темур кўчасидаги 4К105 Асака—Қайрағоч—Ниёзботир автомобиль йўлида жойлашган бўлиб, Жаҳон банки гуруҳи ҳузуридаги Халқаро тараққиёт ассоциацияси иштирокидаги «Маҳаллий аҳамиятдаги минтақавий автомобиль йўлларини ривожлантириш» лойиҳаси доирасида вилоятдаги 20 та кўприк қаторида таъмирланиши белгиланган. Қурилиш ишларини амалга ошириш тендер натижаларига кўра «Карвон йўли» МЧЖга топширилган.
Лойиҳанинг назорат бўлими маҳаллий консултанти Муҳаммаджон Азизовнинг айтишича, ушбу объект 2015 йилда лойиҳалаштирилган. Белгиланган режага асосан, 2020 йилнинг ноябрь ойида қурилиш ишлари бошланиб, кўприкка асфальт ётқизилган. Бироқ ҳаво ҳароратининг кескин тушиб кетиши натижасида қурилиш ишлари якунига етказилмаган.
«Ўша пайтдаги лойиҳада арзимаган ишларни бажариш белгиланган. Келиб кўприкни кўрганимизда эса кўприк титилиб кетаётганини аниқлаганмиз. Шундан кейин топширилган вазифани сифатли қилиб якунлаш мақсадида қайта лойиҳа қилиб, қўшимча маблағ сўрадик. Тўғриси, Жаҳон банкининг маблағларидан қўшимча фойдаланиш масаласи жуда қийин экан. Бу ерга 2020 йилнинг ноябрь ойида асфальт босилган. Ўша пайтда иш билан бирга қўшимчаларни қўшдириб, якуний лойиҳа тайёрлагандик. Лойиҳа тайёр бўлганда ҳаво ҳарорати кескин пасайиши оқибатида совуқ тушиб қолди. Натижада бошлаган ишимизни тугатишнинг иложи бўлмади. Ўзингизга маълум, мана энди кунлар исишни бошлади. Ва бугундан иш бошланди. Узоғи бир ҳафта ичида қурилишни якунига етказамиз», — дейди Муҳаммаджон Азизов.
Лойиҳанинг кўприклар бўйича маҳаллий консултанти Баҳром Алимовнинг маълум қилишича, лойиҳа 2015 йилда қилингани сабабли кўприк ҳозирда ўша пайтда айтилган даражада эмас.
«Шу боис, қўшимча келишув қиляпмиз. Лойиҳада йўлни тепага ўстириш, иккала томондаги ‘тротуаръни асфальтлаш ҳам бор. Лекин шу беш йил ичида ‘тротуарънинг плитаси тўкилиб кетган, туз ‘еворган’. Ғилдирак тўхтатувчини суваш берилган, лекин бу тўкилиб бўлингани учун вазифасини бажармайди. Мана шулар натижасида биз учун қўшимча иш пайдо бўлган. Лойиҳада бунақа ҳолатлар жуда кўп. Пудратчига лойиҳада йўқ ишларни қилдиряпмиз», — дейди Баҳром Алимов.
Алимовнинг маълумот беришича, лойиҳага 7 минг доллар ажратилган. Қўшимча ишлар учун эса яна 5 минг долларга яқин маблағ талаб қилинмоқда.
«Лойиҳага таъмир учун 7 минг доллар ажратилган. Ҳозир яна 4600 долларлик қўшимча иш талаб қилинмоқда. Ажратилган маблағларнинг ярми сарфланган. Сабаби ‘тротуар’ асфальт қилинмаган, қилиб ҳам бўлмайди. Бундан ташқари у томонида ҳам иш бор. Тутқичларни бўяш ишлари ҳам қолган. Кўприк ўзи тўкилиб кетган. Очиб кўрганимизда, қайтадан қилишга мажбурлигимизни билдик. Асосий асфальтлаш ишлари тугаган. Фақат майда-чуйда ишлари қолган. Яна қайтараман, аслида қилаётган ишларимизнинг аксарияти лойиҳага киритилмаган. Шу туфайли ишларимиз якунига етмади. Айни пайтда Жаҳон банкидан бу кўприкка 5 минг, Улуғнордаги нураб кетган кўприкка 80 минг доллар қўшимча маблағ сўралмоқда. Шу иккала кўприк муаммо бўлиб турибди», — дейди Баҳром Алимов.
Асака тумани ҳокимининг биринчи ўринбосари, шаҳар ҳокими Хурсанд Йўлдошев кўприкнинг пиёдалар учун очилган жойи шу ҳолатга келганига бир ой муддат бўлганини, унгача аҳоли томонидан доимий фойдаланиб келинганини билдирди.
«Кўприкда ўтган йилнинг ноябрь ойида асфальтлаш ишлари амалга оширилган. Қилинаётган ишларнинг барчаси Жаҳон банки маблағлари ҳисобидан амалга оширилмоқда. Қурувчилар ҳам бу ерлик эмас. ‘Тротуаръдаги ҳолат бўйича гапирадиган бўлсам, очилган жойи турганига бир ой бўляпти. Сабаби унгача доимий фойдаланиб келинган. Ноябрь ойида ишлар бошланган бўлса, ўша вақтда ҳаво совиб кетганлиги сабабли қурувчилар ишни тўхтатган. Кўприкда таъмирлаш ишларини давом эттириш имконияти йўқлиги сабабли пиёдаларнинг хавфсизлигини таъминлаш мақсадида бу томондаги пиёдалар йўлакчасидаги ҳаракатни чеклаб қўйишга мажбур бўлганмиз. Бундан ташқари туман ҳокими ташаббуси билан йўлнинг иккала томонига ҳам болалар юриши учун қўшимча пиёдалар йўлакчаси қилганмиз. Уни ишлаб турган ‘тротуаръга йўналтирганмиз. Нафақат ёшлар, балки ёши катталар ҳам биз йўналтирган йўлдан юрмаганлигини ҳисобга олиб, қурилиш тугагунга қадар профилактика қилиш учун ходимларни қўйишни режалаштиряпмиз. Улар пиёдаларни ишлаётган ‘тротуаръга йўналтириб туради. Натижада қурилиш ишлари ҳам тўхтамайди, аҳоли ҳам қийинчиликка учрамайди. Яқин атрофда мактаб бор, йўл очиқ. Қатнов катта. Бу ерда иш ҳам кетаверади, шунга қараб ‘тротуар’ ҳам бу ёққа қараб силжийверади», — деди Хурсанд Йўлдошев.
Шаҳар ҳокими қурилишни бир-икки кунда ҳам тугатиш мумкинлигини, аммо сифат даражаси айтилганидек бўлмаслигини, бироз кўпроқ муддат кетса-да, иш давлат стандартлари даражасида бўлиши лозимлигини билдирди.
«Кўприкнинг тагидан ‘опалубка’ ўрнатиб, бетон қуйиб, бир-икки кунда қилинадиган ишни қилиб қўяйлик дедик. Лекин мутахассислар текшириб кўришганда кўприкнинг тагида ёриқ ва тешиклар борлиги аниқланган. Ҳозир ‘тротуарънинг устига кўприкни боғлаш учун бетон қуйиладиган бўляпти. Бунга сабаб нима? Мутахассисларнинг айтишича, ‘тротуар’ кўприкдан кейин қурилган. Шу туфайли боғлама ҳам талаб даражасида эмас. Пудратчилар ишни давлат стандарти даражасида тўлиқ ва сифатли қилиб, ҳаво ҳарорати қандай бўлишидан қатъи назар бир ҳафтада якунлаб беришадиган бўлди. Буни тугатиб, иккинчи ‘тротуаръни ҳам ремонт қилишади. Шахсан ўзим шу ерда туриб назорат қиламан», — деди шаҳар ҳокими.
«Дарё» мухбири ўқувчи бола мурожаати юзасидан Андижон вилояти ҳокими Шуҳрат Абдураҳмоновдан ҳам муносабат олиш мақсадида ҳокимлик ахборот хизмати раҳбари Элёр Матисоқов билан боғланди. Бироқ Матисоқов вилоят ҳокими йиғилишда эканлигини айтиб, вилоят раҳбари «кўприк юзасидан муносабатни туман ҳокимидан олсин» деган фикрни билдирганини маълум қилди.
«Дарё» манбасининг қайд этишича, ушбу кўприкда қурилиш ишлари 2020 йил ноябрь ойида эмас, 2020 йилнинг июль—август ойида олиб борилган. ‘Тротуарънинг чекка қисми эса анча йиллардан буён шундай ҳолатда эканлигини таъкидлаган.
Мавзуга доир:
Изоҳ (0)