Халқаро археологлар гуруҳи Индонезиянинг Сулавеси оролида энг қадимги қоятош расмини топди, деб хабар бермоқда «РБК» Science Advances’га таяниб.
Ўлчами 136х54 сантиметр бўлган ушбу суратда тўқ қизил охра пигменти билан ёввойи чўчқа расми чизилган. Унинг ёши радиоизотоп усули билан аниқланган бўлиб, 45,5 минг йилни ташкил этган.
Тадқиқот ҳаммуаллифи, Гриффит университети археологи Адам Браммнинг сўзларига кўра, бу каби қоятош санъати ҳайратланарли ва қадимги одамларнинг турмуш тарзи ва уларнинг Осиё орқали Австралия қитъасига кўчиши ҳақида тасаввурга эга бўлишга ёрдам беради.
«Бизга маълумки, замонавий инсонлар, бизнинг туримиз, Австралияга етиб бориш учун дунёнинг ушбу қисмидан камида 65 минг йил олдин ўтишлари керак эди», — деган профессор Брамм.
Қўлланилган усул орқали расмнинг минимал ёши 45,5 минг йил деб кўрсатилган бўлса-да, ундан ҳам қадимийроқ бўлиши мумкин. Дастлабки тадқиқотларни тугатгандан сўнг археологлар келажакда ушбу ҳудудда олиб бориладиган ишлар ёши 65 минг йилликдан ҳам ортиқ бўлган ундан ҳам қадимийроқ санъат намунасини аниқлаш имконини беришига умид қилмоқда.
Сулавесининг жанубий минтақаси 1950 йилдан бери қоятош суратлари билан машҳур. Дастлаб археологлар чизмаларнинг ёши кичик, тахминан 10 минг йил деб тахмин қилган. Чунки тропик намлик ундан қадимийроқ бўлган қоятош суратларининг йўқ бўлиб кетишига олиб келган деб ўйлашган. Аммо кейинчалик мутахассислар адашганлиги аниқланди: суратлар минералларга бой бўлган сув оқишидан ҳосил бўлган ярим шаффоф калсит сирт билан қопланган. Қатламда уран борлиги аниқланган ва у қоятош суратининг аниқроқ йилини аниқлашга ёрдам берган.
Ўшандан бери минтақада бошқа суръатлар, шу жумладан, камида 43,9 минг йиллик ов манзаралари расми топилган. Ёввойи чўчқа расми эса 2017 йилда Макассар шаҳри яқинидаги Леанг Тедонгнге номли ғорда топилган бўлиб, археологлар бу ҳақда эндигина хабар берди.
Изоҳ (0)