Демокрит номидаги Фракия университетининг археологлари Испаниянинг Сима-де-лос-Уэсос ғорларида қазишма ишларини олиб бориб, қадимги одамлар экстремал совуққа бардош бериш учун уйқуга кета олганини аниқлади, деб хабар беради Esquire.
Олимлар қадимги одамларнинг қолдиқларини ўрганиб, аниқлашга муваффақ бўлган касаллик ва жароҳатлар биологлар томонидан қишги уйқуга кетадиган ҳайвонларда аниқланадиган касалликларга мос келишини маълум қилган.
Тадқиқот муаллифларининг ҳисоблашича, қадимги инсонлар ўз метаболизмини секинлаштириб, бир неча ой ухлай олган.
Археологларнинг сўзларига кўра, топилган тош қолдиқлар мавсумийликка эга бўлиб, бу ҳар йили ушбу одамларнинг суяги бир неча ойга ўсишдан тўхтаганидан далолат беради.
«Гибернация совуқ ҳаво сабаб ғорда қолган инсонлар учун ойлаб тирик қолиш имконини берган ягона ечим эди», — дейди тадқиқот муаллифларидан бири.
Шунингдек, қайд этилишича, шу ернинг ўзида ғор айиғининг қолдиқлари ҳам топилган ва ундаги шикастлар одамлар қолдиғида аниқланганига мос келган. Олимларнинг сўзларига кўра, бу қадимги одамлар озиқ-овқат камлиги сабаб совуқдан омон чиқиш учун худди айиқлар каби йўл тутганига яна бир исбот бўла олади.
Изоҳ (0)