Россиялик миллиардер Алексей Мордашовнинг ўғли Никита 2020 йилнинг ёзида Олий иқтисодиёт мактабидан ҳайдалгач, армияга хизматга кетди. Бу ҳақда бизнесменнинг ўғлининг танишига таяниб Meduza хабар берди.
«РБК»нинг исмини ошкор этмаган манбасининг сўзларига кўра, Никита Мордашов ўқишни истамагани учун уни армияга отаси юборган.
Никита Мордашов Олий иқтисодиёт мактаби (ОИМ)нинг Жаҳон сиёсати ва жаҳон иқтисодиёти пулли факультетида ўқиган — дастурга кўра, ОИМдаги биринчи курсни якунлаганлар Лондон университетида биринчи курсда ўқиши мумкин. Йил охирига бориб Никита Мордашовнинг баҳолар рейтинги энг пастлардан бири бўлган — максимал 10 дан 2,6 балл. Forbes манбасининг маълум қилишича, Никита Мордашов ушбу дастур бўйича ўқишни хоҳламаган ва ОТМда қолишга интилмаган.
Алексей Мордашовнинг вакили оиланинг шахсий ҳаётига оид вазиятга изоҳ беришни истамаган. ОИМ ҳам ҳолат бўйича ҳозирча маълумот бермаган.
Алексей Мордашов — россиялик энг бадавлат бизнесменлардан бири. 2020 йилда у Forbes версиясига кўра, Россиянинг энг бадавлат инсонлари қаторида 4-ўринни эгаллаган. Нашр Мордашов ва унинг оиласи бойлигини 16,8 миллиард долларга баҳолаган. Bloomberg Billionaires Index маълумотларига кўра эса ҳозирда Мордашовнинг бойлиги 23,2 миллиард долларни ташкил этади.
2019 йилда Алексей Мордашов ўғиллари Кирилл ва Никитага Nordgold олтин қазиш компаниясининг 65 фоиз акциясини беришга қарор қилган. Бундан ташқари, миллиардер TUI AG туроператоридаги 24,9 фоиз улушини ўғилларига берган. Forbes ака-укаларнинг ҳар бирига расмийлаштирилган активларни 2,19 миллиард долларга баҳолаган. Алексей Мордашовнинг жами етти нафар фарзанди бор.
Изоҳ (0)