Перуда Билл Гейтс ва Жорж Соросни коронавирус пандемиясини «яратиш»да айблаган судьялар устидан текширув ўтказилади

Перуда суд ҳокимияти аввалроқ коронавирус Microsoft асосчиси Билл Гейтс ва инвестор Жорж Сорос томонидан яратилгани ҳақида қарор чиқарган Ика ҳудуди судьяларига нисбатан текширув олиб боради, деб хабар бермоқда «РБК».

Текширув «тахмин этилаётган қонун бузилишлари бор-йўқлигини аниқлашга ёрдам берувчи далиллар йиғиш» учун ўтказилади.

Аввалроқ хабар берилганидек, декабрь охирида Чинча ва Писко провинциялари Апелляция жиноий суди судьялари Тито Галегос, Луис Легия ва Тони Чангарай оғир жиноятни содир этганликда айбланувчига нисбатан дастлабки ҳибс муддатини узайтириш ҳақидаги ишни кўриб чиққан.

Суд қарори матнида айбланувчини озод қилишнинг рад этилишига важ сифатида айтилишича, коронавирус инфекцияси пандемияси «дунёга ҳукмронлик қилувчи жиноий элиталар» томонидан сунъий равишда яратилган.

Шунингдек, ҳужжатда таъкидланишича, COVID-19’ни яратиш ва тарқатиш ортида «янги дунё тузуми муаллифлари» — Билл Гейтс, Жорж Сорос ва америкалик бизнесменлар оиласи— Рокфеллерлар турибди. Судьялар қайд этишича, айнан улар «қатъий махфийлик шароитида ўзларининг 2030 йилгача бўлган прогнозларни яратувчи корпорацияларида туриб, коронавирусни бошқармоқда».

Айбланувчининг адвокати фикрича, судьяларнинг бундай баёноти қуруқ муҳокамага асосланган бўлиб, унинг ҳимоясидаги одамни асосли суд қарорига бўлган ҳуқуқдан маҳрум қилади.

Коронавирус пандемияси бошланганидан кейин инфекциянинг сунъий равишда келтириб чиқарилгани ҳақида кўплаб фитна назариялари тарқалди. Уни яратишда Билл Гейтсни, Марказий разведка бошқармасини, Хитой ҳукуматини айблашди. Жаҳон соғлиқни сақлаш ташкилоти эса вирус лабораторияларда яратилган ёки ўзгартирилгани эмас, балки одамларга кўршапалаклардан юққани ҳақидаги фикрга қўшилади.

Шунингдек, пандемия даврида Билл Гейтс сайёра аҳолиси сонини назорат қилиш учун COVID-19’га қарши эмлаш ниқоби остида одамларга чип ўрнатмоқчи эканлиги ҳақидаги фитна назарияси ҳам оммалашиб кетди. Гейтс бундай фикрни рад этиши қийин эканлигини, «чунки бунинг ўзи жуда аҳмоқона ёки ғалати» эканлигини айтганди.