Интерпол Байрут портида 2020 йил августида содир бўлган селитра портлаши ҳақидаги иш бўйича текширув юзасидан икки нафар Россия фуқаросига нисбатан қидирув эълон қилди, деб ёзади Meduza.
Гап селитра етказиб берилган кема капитани Борис Прокошев ҳамда кеманинг хўжайини Игор Гречушкин ҳақида бормоқда. Улар билан биргаликда Грузиядаги фабрикада ушбу селитрани сотиб олган португалиялик Хорхе Морейра ҳам қидирувга берилди.
Интерпол бўйича қидирув Ливан Бош прокуратураси сўрови билан эълон қилинди.
Россияликлар ва португалияликка нисбатан «қизил билдиришнома» берилган. У ҳибс учун халқаро ордерга нисбатан пастроқ приоритетга эга: Интерполга аъзо мамлакатлар бу одамларни қидириш билан шуғулланиши шарт эмас, аммо улар жойлашган жой маълум бўлиб қолса, уларни ушлаш керак.
Прокошев «РБК»га маълум қилишича, қидирувга берилганидан «шокка тушган». «Ахир биз юкни Ливанга эмас, Мозамбикка олиб кетаётган эдик. Уларнинг ўзи кемани Байрутда ушлаб қолгани, уни портдан чиқармаганига мен айбдор эмасман», — деди денгизчи.
Гречушкин ва Прокошев 2020 йил октябридаёқ Ливанда сиртдан ҳибсга олинган эди.
Ливан пойтахти Байрут шаҳридаги портда 2020 йилнинг 4 август куни аммиак селитраси сақланаётган омбор портлаганди. Портлаш кучи шу даражада бўлдики, унинг оқибатида бутун шаҳардаги бинолар зарар кўрди, 190 киши ҳалок бўлди, 300 мингдан ортиқ одам уйсиз қолди.
Мамлакат расмийлари портлаш оқибатида юзага келган умумий зарарни 3-5 миллиард долларга баҳолади. Ҳодиса сабабли мамлакат ҳукумати истеъфога чиқди. Портлашга олти йил аввал божхона хизмати томонидан мусодара қилинган ва портдаги омборда сақланаётган 2750 тонна аммиак селитраси сабаб бўлган.
Изоҳ (0)