Жаҳон соғлиқни сақлаш ташкилоти 35 ёшга тўлган ҳар бир кишига йилда бир маротаба тиббий кўрикдан ўтишни ва энг муҳим тиббий тестларни топширишни тавсия қилади. Бу биринчи навбатда жиддий касалликларни эрта аниқлашга имкон беради ва даволаниш имкониятларини сезиларли даражада оширади. Мунтазам назорат ва ультратовуш ёрдамида амалга ошириладиган текширувлар юрак ва қон томирлари касалликлари, қандли диабет, саратоннинг айрим шаклларини дастлабки босқичда аниқлаши мумкин.
Қон босими
Ҳар бир инсон учун меъёрий босим қандай бўлишини билиш ва уни доимий равишда кузатиб бориш жуда муҳим. 40 ёшдан кейин қон босимини мунтазам равишда ўлчаш одатий ҳолга айланиши керак. Агар қон босимининг юқориси 140, пасткиси эса 90 га тенг бўлса, шошилинч чоралаш кўриш зарур. Шунингдек, айрим мутахассислар қон босими 130/80 дан ошса, шифокорга мурожаат қилишни маслаҳат беради.
Қондаги қанд миқдори
Қондаги қанд миқдорини мунтазам ўлчаб бориш қанд касали ёки диабетнинг иккинчи тоифасини аниқлашга ёрдам беради. Тестни камида йилига икки марта ўтказиш керак. Шунингдек, оила аъзолардан бирортасида қандли диабетга учраган беморлар бўлса, эндокринолог билан ҳам маслаҳатлашиш зарур.
Холестерин
Қонда холестерин миқдорининг кўтарилиши инсульт, юрак хуружи, буйрак касаллиги ва оёқларда қон айланиши хавфини сезиларли даражада оширади. Муаммо шундаки, холестерин ошишининг ҳеч қандай аломати йўқ, уни фақатгина қон текшируви йўли билан аниқлаш мумкин. Шунинг учун йилда бир маротаба қон таҳлилини топширишга одатланиш керак.
Маммография
40 ёшга тўлган аёлларга ҳар йили нафақат маммолог текширувидан ўтиши, балки сут безини маммография қилиш тавсия этилади. 55 ёшдан кейин эса ушбу жараённи икки йилда бир маротаба амалга ошириш тавсия этилади. Агар қариндошлар орасида кўкрак бези саратони билан касалланган беморлар бўлса, ҳар йили сут безларини ультратовуш текширувидан ўтиш тавсия этилади.
Бачадон саратони
Ҳар уч йилда 21-35 ёшдаги аёллар бачадон бўйни саратони хавфининг олдини олиш учун махсус текширувлардан ўтиши керак. 30 ёшдан кейин ҳар беш йилда одам папилломаси вирусига тест топшириш керак.
Колоноскопия
Колоноскопия – йўғон ичак ва ректумдаги ўзгаришларни аниқлайдиган тест. Уни 45 ёшдан кейин ҳар ўн йилда топшириб туриш керак. Ушбу жараён тирналиш хусусияти, шишган тўқималар, ошқозон яраси ва саратоннинг дастлабки шаклларини ўз вақтида аниқлашга ёрдам беради.
Ўпка саратони текшируви
Дастлабки босқичдаёқ даволанишда муваффақиятга эришиш учун ҳар йили томография текширувидан ўтиш керак. Ушбу тадқиқот кашандалар, шунингдек, 55 ёшдан катталар учун жуда муҳимдир. Афсуски, оддий рентгенография тўлиқ маълумот бермайди, шунинг учун шифокорлар айнан томографиядан ўтишни маслаҳат беради.
Тери саратони текшируви
Тери саратони касаллигини кўрсатиш мумкин бўлган шубҳали доғлар ёки холларни аниқлаш учун ҳар йили терини, шу жумладан бош терисини тўлиқ текширтириш учун шифокорга мурожаат қилиш керак. Тери саратонининг илк белгилари намоён бўлгандаёқ даволаш ишлари бошланса, албатта, самарага эришиш мумкин.
Иммунизация
Болаликда одатда кўпгина юқумли касалликдан ҳимояланиш мақсадида зарур бўлган эмлаш ишлари олиб борилади, аммо бу катта бўлгандан сўнг керак бўлмайди, дегани эмас. Иложи борича ҳар йили совуқ мавсумда тарқаладиган гриппга қарши эмланиш керак. Шунингдек, очиқ ҳавода сайр қилиш, спорт билан шуғулланиш ва витаминларга бой маҳсулотларни истеъмол қилиш керак.
Изоҳ (0)