Қашқадарё вилоят Автомобиль йўллари бош бошқармаси «Дарё»да эълон қилинган «Тошкент—Термиз йўлининг Деҳқонободдан ўтган қисми таъмири қурувчилар ‘пулни еб қўйгани’ учун тўхтаб қолган» сарлавҳали хабарга эътироз билдириб, халқаро йўлнинг 13 километри қурилиши қурувчилар «пулни еб қўйгани» билан боғлиқ эмаслигини маълум қилди.
Бошқарма бош муҳандиси Бўри Файзиевнинг «Дарё»га маълумот беришича, ушбу хабарда унинг сўзлари бошқача талқин қилинган.
«Сайтдаги хабарга илова қилинган видеоматериалда вилоят Автомобиль йўллари бош бошқармаси бош муҳандиси Бўри Файзиев саволга жавоб бериш жараёнида қурувчиларнинг ‘пулни еб кетгани’ ҳақида гапирмаган. Ҳолбуки, иш бажарилмаган деганда ишни талаблар даражасида бажарилмаслик ёки вақтида бажарилмаслик каби омиллар ҳам тушунилади», — дейилади бошқарманинг «Дарё»га тақдим этган муносабатида.
Бошқарма муносабатида айтилишича, халқаро йўлнинг Деҳқонобод туманидан ўтган қисмини қуриш учун бош пудратчи сифатида «Бекободйўлсаноат» ИЧК ва «Ангрен» БПИМБ танлаб олинган.
«Қурувчилар томонидан ишлар тўғри ташкил қилинмагани, корхонада йўл қурилиши ишлари учун малакали мутахассислар, муҳандис-техник ходимлар етишмаслиги оқибатида қурилиш жараёнида даврий тўхталишлар доимий равишда бўлиб турган. Ва охир-оқибатда қайта қуриш ишлари тўхтаб қолган. Юқоридагилардан хулосаланиб буюртмачи — ‘Умумий фойдаланишдаги автомобиль йўлларини қуриш ва реконструкция қилиш дирекцияси’ давлат унитар корхонаси бош пудратчи корхоналар билан тузилган пудрат шартномаларини суд орқали тегишли тартибда бекор қилган», — дейилади ташкилотнинг расмий баёнотида.
Маълумот берилишича, халқаро М39 автомобиль йўлининг 1265-1291 ва 1297-1315 километрлари оралиғини қайта қуриш ишлари учун 120 миллиард сўм ажратилган. Бош пудратчи корхоналар 2013—2017 йиллар давомида йўл кўтармасини қуриш, сунъий иншоотларни қуриш ва узайтириш, йўл асосини қуриш ва айрим йўл участкаларида қоплама остини асфальтобетон қоришмасидан қуриш ишларини бажариб, ишнинг 35 фоизини якунлаган.
«Бажарилган ишлар доимий равишда буюртмачи ташкилот мутахассислари ва синов лаборатория вакиллари томонидан назорат қилиб борилган ҳамда ҳужжатлари расмийлаштирилиб, тўлови вақтида амалга ошириб борилган. Қолдиқ иш ҳажмлари молиялаштирилмаган. Юқоридагилардан хулоса қиладиган бўлсак, иш қурувчиларнинг ‘пулни еб қўйгани’ учун тўхтаб қолмаган. Балки, мутахассисларнинг етарли малакага эга эмаслиги ва ишга тўғри ёндашилмагани сабабли тўхтаб қолган. Қилинган иш учун маблағ тўланган, қолган маблағ эса буюртмачи ихтиёрида турибди», — дейилади ташкилот маълумотида.
«Дарё» мухбири билан телефон орқали мулоқот қилган бошқарма бош муҳандиси Бўри Файзиевнинг айтишича, матбуот анжуманида берган маълумоти учун у Қурилиш вазирлигига тушунтириш хати ҳам ёзган.
Изоҳ (0)