Ўзбекистонда хотин-қизлар масалалари билан шуғулланадиган, уларга ҳар томонлама ёрдам кўрсатиб, қўллаб-қувватлайдиган агентлик ташкил этилиши мумкин. Бу ҳақда Қонунчилик палатасининг демократик институтлар, нодавлат ташкилотлар ва фуқароларнинг ўзини ўзи бошқариш органлари қўмитаси томонидан «Давлат ва жамият бошқарувида аёлларнинг ўрни ва мавқейини янада оширишнинг муҳим масалалари» мавзусида ўтказилган давра суҳбатида қайд этилган.
Қайд этилишича, бугун республика давлат ва жамоат ташкилотлари тизимида 1400 га яқин хотин-қизлар раҳбарлик лавозимларида фаолият олиб бормоқда. Уларнинг улуши соғлиқни сақлаш ва ижтимоий хизмат соҳасида 82 фоизни, илм-фан, таълим-тарбия, маданият ва санъат соҳасида 72 фоизни, қишлоқ хўжалигида 45 фоизни, саноатда 38 фоизни ташкил этмоқда.
«Маълумки, Хотин-қизларни ўйлантираётган энг асосий муаммолардан бири уларнинг бандлигини таъминлашдир. Муаммоларнинг кўпи ҳам шу масалага боғлиқ бўлиб қолмоқда. Ўзбекистонда 1 миллион атрофида ишсиз аёл бор, бунга доимий иш ўрнига эга бўлмаган, мавсумий ишларда банд аёллар қўшилса, уларнинг сони 2-2,5 миллионни ташкил қилади. Оғир ижтимоий вазиятга тушиб қолган ёлғиз оналарни уй-жой билан таъминлаш масалалари ҳам бугунги кундаги оғриқли муаммолардан биридир. Аммо кўплаб аёлларимиз мана шундай оғриқли дардларини кимга, қаерга айтишини, кимдан ёрдам олишини ҳар доим ҳам билавермайди», — дейилади Парламент хабарида.
Давра суҳбатида иштирокчилар хотин-қизлар масалалари билан шуғулланадиган, уларга ҳар томонлама ёрдам кўрсатиб, қўллаб-қувватлайдиган, чуқур таҳлил юритадиган яхлит тизим яратиш эҳтиёжи сезилаётганини муҳокама қилди ҳамда хотин-қизлар масалалари бўйича агентлик ташкил этиш масаласини ўйлаб кўриш лозимлиги таъкидланган.
Шунингдек, барча даражадаги давлат ва жамоат ташкилотларида салоҳиятли, билимли, малакали аёлларни раҳбарлик вазифасига тайинлаш бўйича квоталаш тартибини киритиш таклифи ҳам мақсадга мувофиқ экани айтилган.
Эслатиб ўтамиз, Шавкат Мирзиёев 29 декабрь куни Олий Мажлисга йўллаган Мурожаатномасида ислоҳотларнинг устувор йўналишларидан бири аёлларнинг давлат ва жамоат бошқарувидаги ролини янада ошириш эканини айтиб ўтганди. «Мамлакатда яшовчи 17 миллиондан зиёд аёллар — қизларимиз, оналаримиз ва бувиларимиз учун муносиб турмуш шароитларини яратиш учун қўлимиздан келган барча ишни амалга оширишимиз лозим», — деган эди Президент.
Изоҳ (0)