АҚШ Халқаро тараққиёт молия корпорацияси (DFC) Ўзбекистон Иброҳим жамғармасини қўллаб-қувватлашини маълум қилди. Бу ҳақда АҚШнинг Ўзбекистондаги элчихонаси матбуот хизмати хабар берди.
Ушбу жамғарма АҚШ, Исроил ва Бирлашган Араб Амирликлари томонидан 2020 йил 20 октябрда очилган. Жамғарма орқали уч мамлакат минтақавий иқтисодий ҳамкорликни ривожлантиришга қаратилган хусусий сектор бошчилигида амалга оширилувчи сармоялар ва тараққиёт ташаббуслари учун 3 миллиард доллардан ортиқ маблағ сарфлашни кўзлайди.
Ўзбекистон иқтисодий ҳамкорлик ва алоқаларни яхшилаш учун жамғармага 50 миллион долларгача маблағ ажратади.
«Биз Ўзбекистоннинг Иброҳим жамғармасини қўллаб-қувватлаши мамлакатларимизнинг минтақавий ҳамкорликни ривожлантиришга бўлган садоқатининг ажойиб намунаси бўлади ҳамда минтақада қашшоқликни камайтириш, унумдорлик ва иш билан таъминлашни кучайтириш, иқтисодий ўсишда муҳим рол ўйнайди, деб умид қиламиз»,— деган бош вазир ўринбосари, Инвестициялар ва ташқи савдо вазири Сардор Умурзоқов.
«Биз Ўзбекистон билан тобора ўсиб бораётган шерикчиликдан фахрланамиз ҳамда унинг Иброҳим жамғармасини қўллаб-қувватлашини умумий мақсадларимизни кенгайтириш йўлидаги муҳим қадам деб биламиз», — деган DFC бош ижрочи директори Адам Болер.
Эслатиб ўтамиз, АҚШ, Ўзбекистон ва Қозоғистон ҳукуматлари 7 январь куни «Марказий Осиё инвестициявий шериклиги» ташаббуси йўлга қўйилиши ҳақида маълум қилди. Мамлакатлар хусусий сектор ўсишига ҳамда иқтисодий алоқаларни кенгайтиришга хизмат қиладиган лойиҳаларни қўллаб-қувватлаш учун беш йил ичида камида 1 миллиард доллар маблағ жалб этиш ниятида. DFC раҳбари Адам Болер ушбу ташаббусни расман ишга тушириш мақсадида Тошкентга ташриф буюрди.
Изоҳ (0)