Урфга яна барча яхши кўриб киядиган жинси матосидаги клёш шимлар қайтмоқда. Албатта, тиззадан пастга қараб кенгайиб кетувчи шимларни қандай кофта ёки костюмлар билан кийиш мумкин деган савол ҳам туғилиши табиий. Бу борада стилистлар жинси шимлар учун ажойиб комбинацияни ҳосил қиладиган юқори қисм кийимлари ёки аксессуарлар ҳақида ўзларининг тавсиясини аямайди.
Тепа қисм мос бўлиши керак
«Бутcут» услубидаги жинси шим айнан шу матодаги кўйлак ва костюм билан жуда ҳам ажойиб кўринишга эга бўлади. Кофта ва шимнинг уйғунлашуви ҳамда костюм туфайли услубнинг бойитилиши ҳар қандай гўзал хоним ташқи кўринишида муҳим рол ўйнайди. Шунингдек, бу каби жинси шимлар тўқилган свитер ва жемперлар билан ҳам мослаша олади.
Устки кийим ҳам муҳим саналади
Клёш шимларни мўйналар ёки уларнинг калтароқ услубдагиси билан кийиш мумкин. Шунингдек, мўйна харид қилишда уларнинг сунъийсини сотиб олиш тавсия этилади. Сабаби улар ҳар қандай об-ҳавода ҳам чидамли ҳисобланади. Қоматни янада ихчам ва узун кўрсатиш учун эса мўйна бичими трапеция шаклида бўлиши афзал. Шундагина клёш шим билан ҳосил қилинган комбинация ташқи кўринишдаги нуқсонларни яширади.
Пойабзаллар учун ҳам алоҳида танлов лозим
Ушбу модель кенг пошнали пойабзаллар билан яхши кўриниши мумкин. Клёш шимнинг ичида оёқ кичкина ёки умуман кўримай қолмаслиги учун ҳам бироз оёққа ҳажм қўшади. Олд қисми тўртбурчак туфли ёки этиклар ҳам янада чиройли тасвирни яратишга ёрдам беради.
Жинси шим ва аксессуарлар
Клёш жинси шимлар жасур, ўзига ишонувчан ва дадил қиз образини яратишда ёрдам беради. Демак, бундай услубда аксессуар танлашда жуда эҳтиёт бўлиш керак. Масалан, тўқилган сумка, шляпа, думалоқ кўзойнак кабилар образ учун ажойиб қўшимча бўлади. Ушбу кўриниш билан фильмлардаги безори қизларни ёдга солиш ҳеч гап эмас.
Аралаш услуб ҳосил қилиш мумкин
Клёш шимларни нафақат юқорида тавсия қилинганлар билан кийиш, балки классик услубдаги нафис кофталарга ҳам мослаш мумкин. Масалан, клёш шимлар панчо ёки шунга ўхшаш кофталар билан уйғунлаштириш фолклор услубини ҳам ёдга солади. Қисқа қилиб айтганда, клёш жинси шимлар бошқа либосларга ўхшаб инжиқ эмас ва фақат биргина либос комбинацияси билан чекланмайди. Шундай экан, гардеробдаги мавжуд нарсалар билан уйғунлашиш имконига эга клёш жинси шимдан унумли фойдаланиш мумкин.
Изоҳ (0)