«Tиффанидаги нонушта», «Титаник», «Кариб денгизи қароқчилари» ва бошқа фильмларнинг муваффақияти ундаги бош қаҳрамон ролини ижро қилган актёр ва актрисалар карьерасига ҳам ўз таъсирини кўрсатган. Лекин ушбу ижодкорлар ўрнида тамоман бошқа юлдузлар бўлиши ҳам мумкин эди.
Мэттью Макконахи (Жек, «Титаник»)
Актёр киносаноат тарихидаги энг муваффақиятли фильмлардан бири бўлган «Титаник»да суратга тушишдан бош тортган. Режиссёр Жеймс Кэмероннинг айтишича, Жек роли таклиф қилинганида Мэттью ушбу қаҳрамон қизиқарли эмас, деган фикрни билдирган. Гвинет Пелтроу эса Роуз қаҳрамонини гавдалантиришни истамаган.
Леонардо Ди Каприо (Патрик Бейтман, «Америкалик психопат»)
Лео «Америкалик психопат» фильмида телба қотил ролини ижроси учун Кристиан Бэйлга рақиб бўлган. Уларнинг ҳар иккиси ҳам ушбу ролни қўлга киритишга қанчалик уринишига қарамай, ижро Бэйлга насиб қилган. Кристиан бу ҳақида гап кетганида телба ва ақлдан озганлар ролини гавдалантириш Леонинг ташқи кўринишига тўғри келмаслиги, ўзининг қиёфаси эса бундай қаҳрамонлар учун айни муддао эканини таъкидлаган.
Жим Керри (Жек Читтак , «Кариб денгизи қароқчилари»)
Жонни Деппнинг арсеналида «Кариб денгизи қароқчилари» фильмигача ҳам муваффақиятли ижролар етарли эканига қарамай, Жек Читтак ижроси унга ҳақиқий юлдузлик олиб келган. Аммо Жим Керри бошқа лойиҳа сабаб воз кечмаганида мухлислар Жек образида Жоннини кўрмаган бўларди.
Брюс Уиллис (Сем, «Руҳ»)
Таъсирли севги ҳикоясини ўзида мужассам қилган мазкур фильмни Деми Мур ва Патрик Суэйзисиз тасаввур қилиб бўлмайди. Аммо Сем роли Патрикка тўсатдан насиб қилган. Гап шундаки, Брюс Уиллисга суратга тушиш таклиф қилинганда у фильмни муваффақиятсиз бўлади деб ҳисоблаган ва рад этган. Режиссёрнинг боши қотган бир вақтда фильм сценарий муаллифи Жоэл Рубин Патрикнинг интервьюсини кўриб, қизиқиб қолган. Режиссёр Суэйзини лойиҳада иштирок этишини истамаган, аммо синовдан кейин фикридан қайтган.
Тим Рот (Северус Снейп, «Гарри Поттер ва Ҳикматлар тоши»)
Профессор роли учун келиб чиқиши британиялик бўлган Тим Ротдан яхшироқ вариант бўлмаган. Аммо актёр «Маймунлар сайёраси»да суратга тушишни афзал билиб «Гарри Поттер»да суратга тушишни рад этган.
Эмили Уотсон («Амели»)
Ушбу фильмни Одри Тотусиз тасаввур қилиб бўлмаслигига қарамай, ҳаммаси бошқача бўлиши ҳам мумкин эди. Режиссёр Жан-Пьер Жене аслида Эмили Уотсонни асосий қаҳрамон сифатида кўрган. Аммо актриса француз тилини билмагани ва бошқа лойиҳага розилик бергани режаларни ўзгартириб юборган. Тасодифан насиб қилган роль эса Тоту учун омадли бўлган.
Жейк Жилленхол (Фродо, «Узуклар ҳукмдори»)
«Узуклар ҳукмдори» фильмида Элайжа Вуд ижро қилган қаҳрамонни аслида Жейк гавдалантириши керак бўлган. Ҳаяжони сабаб синов вақтида ўзини етарлича кўрсата олмагани сабаб режиссёр рол ижрочисини ўзгартиришга қарор қилган ва Жейкни энг ёмон актёр деб атаган. Жилленхолнинг ролдан айрилгани унинг карьерасидаги муваффақиятларга таъсир қилмаган. «Оскар» мукофотига номзод бўлган актёр энг талабгир киносаноат вакили ҳисобланади.
Мерилин Монро (Холли Голайтли, «Tиффанидаги нонушта»)
Блейк Эдварднинг жаҳон кинематографи классикаси ҳисобланган мазкур фильмини Одрисиз тасаввур қилиб бўлмайди. Аммо Холли Голайтли ролини Голливуднинг бошқа бир юлдузи Мерилин Монро ижро қилиши мумкин эди.
Изоҳ (0)