Ўзбекистон иссиқлик электр станциялари ва мамлакат энергетика тизимининг ишлаш тартиби тўлиқ тикланди, деб хабар берди Энергетика вазирлиги.
Марказий Осиёнинг ягона энергия тизимининг электр узатиш линияларида 5 январь куни содир бўлган фавқулодда вазиятни ўрганиш бўйича комиссия носозлик сабабини аниқлади.
Дастлабки маълумотларга кўра, Талимаржон ИЭСдаги буғ-газ қурилмалари ортиқча юклама билан ишлаши оқибатида носозлик юзага келган ва аварияга қарши автоматика ишлаб режадан ташқари ўчирилган. Бунинг натижасида Марказий Осиёнинг ягона энергия тизимини (ЯЭТ) Россия ва Қозоғистоннинг ягона энергия тизими билан боғлайдиган транзит тармоқларида юклама кескин кўтарилган. Бу эса энергия тизимларининг параллел ишлаши барқарорлигининг бузилишига олиб келди.
«Электр узатиш тармоқларида авария ҳолатини бошқариш тизими ишга туширган, натижада Қозоғистон шимолий қисмининг энергия тизими Марказий Осиё ИЭСидан ажратилган. Ўрта Осиё УЭС частотаси 48,15 герцгача камайган. Шу билан бирга, бир қатор истеъмолчилар электр таъминотидан автоматик тарзда узилган ва иссиқлик электр станцияларининг энергия блоклари юкламалари туширилди», – дейилади Энергетика вазирлиги хабарида.
Вазирликнинг қўшимча қилишича, ишга туширилган аварияга қарши автоматик бошқариш тизими «энергия блоклари учун катта миқдордаги муаммолар ва зарарли оқибатларнинг олдини олишга хизмат қилади».
«Тадбирлар таҳлили асосида ва шу каби ҳодисаларнинг олдини олиш мақсадида режали чоралар ишлаб чиқилмоқда», – дейилади вазирлик хабарида.
Аввалроқ Қозоғистон ва Қирғизистон электр узилишларига Ўзбекистон электр тизимидаги муаммоларни сабаб қилиб кўрсатгани ҳамда Қашқадарёда электр узилишлари сабабли сув таъминоти тўхтагани ҳақида хабар берилганди.
Изоҳ (0)