Наманганда қурилаётган кўприк қулаши оқибатида талафотлар бўлмагани маълум қилинди

Ижтимоий тармоқларда Давлатобод туманидаги Шимолий Фарғона канали устида қурилаётган кўприк қулаб тушгани ҳақида хабарлар тарқалди.

Гувоҳларга кўра, мазкур ҳодиса бугун, 8 январь куни соат 11:00 атрофида рўй берган. Бунинг оқибатида қурбонлар ёки жабрланганлар бўлмаган.

«Дарё» мухбири Азизбек Абдувалиевнинг аниқлик киритишича, узунлиги 37 метр, эни 3 метр бўлган ва пиёдалар қатнови учун мўлжалланган кўприк маҳаллий тадбиркор томонидан «Ўн бир Аҳмад» зиёратгоҳига келувчилар учун қулайлик яратиш мақсадида барпо этилаётган бўлган. Бунинг учун давлат бюджетидан маблағ сарфланмаган. Буни «Наманган кўприклардан фойдаланиш» унитар корхонаси раҳбари Санжарбек Шодмонов ҳам тасдиқлади.

— Кўприк дастурларга ҳам киритилмаган, бюджет маблағи ҳам сарфланмаган. Тадбиркор Маъруфхон Ҳожихоновнинг ташаббуси ва шахсий маблағи ҳисобидан қурилаётган, ҳали якунига етмаган эди, — дейди Санжарбек Шодмонов.

Тадбиркор Маъруфхон Ҳожихоновнинг таъкидлашича, бу ишга яқинда 90 ёшида қазо қилган отасининг васиятини амалга ошириш учун киришган.

— Дадам Маматхон Хожихонов ўлимларидан олдин маблағларини кўприк ёки масжид учун ишлатишни васият қилганди. «Ўн бир Аҳмад» зиёратгоҳига келадиганлар қийналмаслиги учун шу ишга қўл урдим. Кўприк тайёр бўлганидан кейин шу атрофдаги автотураргоҳда бир ҳафта 5 тоннадан ошиқ юк қўйилган ҳолатда турди, қилт этмади. Кейин жойида синаб кўрдик. Ҳаво ҳарорати пасайиб, каналдаги сув оқими кўпайгани сабабли ҳали ишимиз охирига етмаган эди, — дейди Маъруфхон Ҳожихонов.

Тадбиркорнинг айтишича, кўприкнинг монтаж ишлари тўлиқ якунланмаган, икки томонига яна трос ва темир ўрнатилади. Буларнинг барчасига икки ҳафта атрофида вақт талаб этилади. Шундан сўнг кўприк аввалги жойига мустаҳкам этиб ўрнатилади.