Ўзбекистонда апрель ойидан бошлаб янги тартиб кучга кириб, унга кўра, пудрат ташкилотлари янги қурилган барча уйларни деворларга ишлов бериш ва коммуникация тармоқларини тортиш бўйича ишлар 100 фоиз бажарилган ҳолда топширишлари лозим бўлади. Бу ҳақда қурилиш вазирининг биринчи ўринбосари Шерзод Ҳидоятов 8 январь, жума куни ўтказилган матбуот анжуманида маълум қилди.
Бу аҳолига янада қулай шарт-шароит яратиш мақсадида амалга оширилмоқда.
Spot’нинг қайд этишича, 2020 йилда Ўзбекистондаги ипотека кредитлари бозор рельсларига ўтказилди. Уй-жой сотиб олиш учун кредитлар бўйича фоиз ставкалари йиллик 26—32 фоиздан 18—22 фоизгача камайтирилди.
2020 йил 10 сентябрь куни Марказий банк асосий ставкани 15 фоиздан 14 фоизгача пасайтирди. Шу сабабли банклар 1 октябрдан кредит ва депозитлар бўйича ставкаларни пасайтира бошлади.
Ипотека кредитлари ҳам истисно эмас. 2020 йилнинг май ойи билан таққослаганда айрим банклар ипотека кредитлаш шартларини юмшатган.
Ҳукумат томонидан жорий этилган янги дастурга кўра, ипотека 20 йилга берилади. Шаҳарларда дастлабки тўлов 20 фоиз, қишлоқ жойларда 10 фоизни ташкил қилади, таъминлаш — сотиб олинадиган квартиранинг гарови.
Давлат дастури асосида кредит ажратадиган банкларнинг ярмидан кўпи ставкаларни 1—2 фоиз даражага пасайтирди. Жумладан, қишлоқларда уй сотиб олиш бўйича энг паст кўрсаткич 18 фоиздан 17 фоизгача, Тошкент шаҳрида 19—20 фоиздан 18 фоизгача пасайди.
Изоҳ (0)