Pandemiya sababli ishsizlik nafaqat o‘rta qatlamga, balki dunyoning eng yaxshi futbol murabbiylariga ham ma’lum miqdorda zarar yetkazdi. Quyida 2020-yilda xizmatlariga ehtiyoj sezilmagan taniqli mutaxassislar haqida fikr yuritiladi.
Marku Silva, 2019-yilning 5-dekabridan beri ishsiz
So‘nggi klubi: “Everton”
2018-yilning may oyida Silva “Everton” boshqaruvini qabul qilib oldi. 2018/2019-yilgi mavsumda jamoa portugaliyalikning qo‘l ostida Angliya chempionatida sakkizinchi o‘rinni egallab, Yevrokuboklar yo‘llanmasini qo‘lga kirita olmadi. Yangi mavsum starti ham ko‘ngildagidek bo‘lmadi, natijada jamoa 14 ochko bilan turnir jadvalida 18-o‘ringa tushib ketdi. Shundan so‘ng Silvaga chiqish eshiklari ko‘rsatildi.
Bundan tashqari Markuning muvaffaqiyatsizliklari “Everton”ning kelajakdagi ishlariga ham o‘z ta’sirini o‘tkazdi: jamoaning yangi bosh murabbiyi Karlo Anchelotti rekord darajadagi yo‘qotishlar tufayli o‘zidan oldingi murabbiyga berilgani kabi 2020-yilning qishida katta transferlarni amalga oshira olmadi.
Mark van Bommel, 2019-yilning 16-dekabridan beri ishsiz
So‘nggi klubi: PSV
“Natijalar juda yomon va PSV bunga loyiq emas. Musobaqalar muhim, ammo mashg‘ulotlar jarayoni ham hal qiluvchi ahamiyatga ega. Biz buni diqqat bilan kuzatmoqdamiz. PSV – hamma bir-biriga yordam berishga intiladigan klub. So‘nggi oylarda ham biz barchaga yordam berishga harakat qildik. Ammo klub manfaatlari har doim birinchi o‘rinda turadi. Vaziyatni baholash oxir-oqibat ushbu og‘riqli qarorga olib keldi. Vaziyatni o‘zgartirish uchun qo‘limizdan kelgan barcha ishni qildik. Afsuski, biz muvaffaqiyat qozona olmadik”, – deydi PSV bosh direktori Toon Gerbrands van Bommelning ishiga baho berar ekan.
Niderlandiyalik mutaxassis klubni chempionlikka yetaklay olmadi va 2019-yilning dekabrida 17-turdan so‘ng ishdan bo‘shatildi. O‘shanda PSV 31 ochko bilan mamlakat chempionati turnir jadvalida 4-o‘rinni egallab turgan edi.
May oyida esa van Bommel o‘z xizmatlarini “Milan”ga taklif qildi, ammo klub bosh murabbiy lavozimida Stefano Piolini saqlab qoldi.
Massimiliano Allegri, 2019-yilning 30-iyunidan beri ishsiz
So‘nggi klubi: “Yuventus”
Allegri bir yil davomida futboldan dam oldi va o‘tgan 2020-yilning yozida ishga qaytishga tayyorligini e’lon qildi.
“Men bo‘sh vaqtimni dam olishga va oilam, yaqinlarimga sarfladim. Ona shahrim Livornoda eski do‘stlarim vaqtimizni chog‘ o‘tkazdik. Qaysi mamlakatda ishlashim men uchun ahamiyatsiz. Birgalikda harakat qiladigan va ambitsiyalarga ega klubni izlayapman”, – deydi Allegri.
Italiyalik mutaxassisning kelishi mumkin bo‘lgan jamoalar qatorida “Manchester Yunayted”, PSJ, “Inter”, Niderlandiya terma jamoasi va “Chelsi” ko‘rsatilgandi.
Murabbiyning o‘zi esa dekabr oyida o‘zini Angliyada sinab ko‘rmoqchi ekanligini aytdi. “Albatta, men o‘zimni Angliya Premyer Ligasida sinab ko‘rmoqchiman. Italiya jamoalarida — to‘rt yil “Milan”da, besh yil “Yuventus”da ishlaganman. Endi yana Italiyada yoki Angliyada ishlashni kutmoqdaman. Hozirda ingliz futboli o‘smoqda, chunki u yerda chet ellik murabbiylar juda ko‘p, 10 yil oldingiga qaraganda taktika ko‘proq. Angliya endilikda taktika jihatidan ancha murakkab va mukammalroq, ammo u shu bilan birga o‘z an’analarini ham hurmat qiladi”, – degandi Allegri Goal’ga bergan intervyusida.
Ammo so‘nggi ma’lumotlarga ko‘ra, Massimilianoning “Inter”da Kontening o‘rnini egallashi ehtimoli yuqori.
Luchano Spalletti, 2019-yilning 30-mayidan beri ishsiz
So‘nggi klubi: “Inter”
Spaletti “Inter”da hech qanday muvaffaqiyatga erisha olmadi. Luchano hatto klub bilan shartnomani o‘z ixtiyori bilan bekor qilishdan bosh tortdi, unga ko‘ra mutaxassis 2021-yilning yozigacha bir mavsum uchun 4,5 million yevro maosh olardi. 2020-yilning may oyida mutaxassis ishga qaytish istagini bildirdi.
“Masalaning moliyaviy tomoni meni qiziqtirmaydi. Bu ish bilan menga yoqqani uchun shug‘ullanaman. Murabbiylik kursisiga qaytmoqchiman”, – deydi Spalletti.
Biroq Luchano 2020-yilda hech bir klubda ko‘rinmadi. Hozircha italiyalikning faqat mahalliy jamoalarni boshqarishi mumkinligi haqida mish-mishlar mavjud.
Marselino Toral, 2019-yilning 11-sentabridan beri ishsiz
So‘nggi klubi: “Valensiya”
Chempionatda to‘rtinchi o‘rin, Chempionlar Ligasi yo‘llanmasi, Ispaniya Kubogi – bularning hech biri Marselinoni “Valensiya”da olib qola olmadi. Mutaxassisning iste’fosi 2019-yilda Ispaniyada katta rezonanslarga sabab bo‘lgandi. Toral ham “Inter”ni boshqarish uchun da’vogarlardan biri bo‘lib turibdi. Bundan tashqari, uning nomi noyabr oyida “Atletik”ning short-listida qayd etilgandi. Murabbiyning o‘zi butun faoliyati davomida faqat Ispaniya klublarida faoliyat yuritgan. Shuni hisobga olib uni chet elda ko‘rish ancha qiziq bo‘lar edi.
Leonardo Jardim, 2019-yilning 27-dekabridan beri ishsiz
So‘nggi klubi: “Monako”
Bitta daryoga ikki marta tushib bo‘lmaydi, lekin “Monako”ni ikki marta boshqarish mumkin. Jardim klubga ikkinchi bor kelganidan so‘ng jamoaning natijalari yaxshilandi, ammo rahbariyat istagan darajada emas. Shartnomani bekor qilish uchun Leonardo o‘zining uch nafar yordamchisi bilan birgalikda 8 million yevro miqdorida tovon puli oldi.
“Klub bosh direktori Oleg Petrov jamoadan ketishimning asosiy tashabbuskori. Men hech qachon uning murabbiyi bo‘lganimni his qilmaganman. Rojdestvo ta’tilidan keyin Petrov meni o‘z xonasiga chaqirdi va klub prezidentidan mening iste’fomni so‘raganini aytdi”, – deydi Jardim klubdan ketishining sabablari haqida.
May oyida “Monako”ning sobiq murabbiyi “Marsel”ni boshqarishi mumkin edi, biroq muzokaralar muvaffaqiyatli o‘tmadi. So‘nggi xabarlarga ko‘ra, Jardim 2021-yilda Moskvaning “Spartak” klubini boshqarishi kutilmoqda.
So‘nggi klubi: “Sauthempton”
Hyuz uch yildan beri ishsiz yuribdi. Ingliz mutaxassisi “Sauthempton”dan bo‘shatilganidan so‘ng Premyer Liga tarixida bir kalendar yilida ikki marta ishdan bo‘shatilgan ilk murabbiyga aylandi. Mark dastlab “Stok Siti”ni boshqargan va u yerda jamoaning yomon o‘yini tufayli ishdan bo‘shatilgandi.
Shundan so‘ng mutaxassis “Sauthempton”ni boshqarishni o‘z zimmasiga oldi, u jamoani Chempionshipga tushib ketishiga yo‘l qo‘ymasligi kerak edi. Ammo 14-turdan so‘ng “Sauthempton” yana xavfli zonaga tushib ketdi. Hyuz shartnoma muddatidan oldin bekor qilganligi uchun tovon puli sifatida 6 million funt sterlingga (taxminan 6,7 million yevro) ega chiqdi.
Vinchenso Montella, 2019-yilning 21-dekabridan beri ishsiz
So‘nggi klubi: “Fiorentina”
Montella “Roma” qarshi kechgan o‘yindan so‘ng (1:4) “Fiorentina”ni tark etdi.
“Bu jamoa muxlislari (“Fiorentina”) ko‘proq narsaga loyiqdir. Bunga hech shubha yo‘q. Ushbu klub ishqibozlari qalbimda mangu qoladi.
Men, mening shtabim va futbolchilar tomonidan ba’zi xatolarga yo‘l qo‘yildi. Ammo, ehtimol, xatolarga faqat biz yo‘l qo‘ymadik. Qaysi futbolchini o‘ynatishim kerakligi haqida ko‘rsatmalar mavjud edi. Lekin hech kim mendan nima istayotganimni so‘ramadi ham. Mavsum uchun hech qanday maqsad yo‘q edi. Tarkibni yangilab, raqobat darajasini ko‘tarish uchun yanvar oyini kutgan edik, birgalikda vaziyatni tahlil qilgandik. Agar iste’fodan ranjimadim desam, yolg‘on gapirgan bo‘laman. Ishonamanki, mavsumning ikkinchi qismida yaxshiroq o‘ynagan bo‘lardik”, – deydi Montella.
Vinchensoning kelajagi haqida hech qanday mish-mishlar yo‘q. Aftidan, murabbiy hali futbolni sog‘inmagan ko‘rinadi.
Izoh (0)