2-yanvar kuni AQShning Kentukki shtati Luisvill shahrida vandallar Kongress senatidagi ko‘pchilik yetakchisi, respublikachi Mitch Makkonnellning uyiga hujum qildi, deb xabar bermoqda Meduza.
Uyning kirish eshigiga bo‘yoq bilan “Mening pullarim qani?” deb, derazaga esa “Mitch kambag‘allarni o‘ldirmoqda” deb yozib ketishdi.
Mitch McConnell’s Louisville home vandalized after blocking $2000 stimulus checks.
— Complex (@Complex) January 2, 2021
More: https://t.co/6DiCDKea8U pic.twitter.com/KVqZcPwS9N
Xuddi shunday holat shu kuniyoq Kaliforniyada ham yuz berdi — vandallar, OAVlar xabariga ko‘ra, Kongress vakillar palatasi spikeri, demokrat Nensi Pelosining San-Fransiskodagi uyiga hujum qildi. Garaj eshigiga “Ijarani bekor qil” va “Biz hamma narsani xohlaymiz” deb yozib, trotuarda sun’iy qonga belangan cho‘chqa kallasini qoldirishdi.
Nancy Pelosi's home vandalized with graffiti, pig head: reports https://t.co/LfihkuCHId pic.twitter.com/g9g5mVyoqK
— New York Post (@nypost) January 2, 2021
Kentukki gubernatori Endi Besher Makkonnellning uyidagi vandalizmni “nomaqbul” deb atadi. “Birinchi tuzatish bizning so‘z erkinligimizni himoya qilsa-da, har qanday sabab asosidagi vandalizm ham nojo‘ya va nomaqbuldir”, — deb yozdi u Twitter’da.
Hodisani izohlar ekan, Mitch Makkonnell “jamiyatimizda vandalizmga va qo‘rqitish siyosatiga o‘rin yo‘q” deb aytdi. Nensi Pelosi esa buni izohlaganicha yo‘q.
Eslatib o‘tamiz, 28-dekabr kuni AQSh Kongressining Vakillar palatasi pandemiya sharoitida amerikaliklarga to‘lanadigan to‘g‘ridan to‘g‘ri to‘lovlar miqdorini 600 dan 2000 dollargacha oshirish taklifini qo‘llab-quvvatladi. Respublikachilar tomonidan nazorat qilinuvchi senat bu tashabbusni rad etdi, ammo bungacha u AQShning amaldagi prezidenti Donald Tramp tomonidan qo‘llab-quvvatlangan edi.
Avvalroq AQSh Kongressi koronavirus tarqalishi fonida iqtisodiyotni qo‘llab-quvvatlashga qaratilgan 892 milliard dollarlik yangi paket loyihasini ma’qullagan edi. Paket aksariyat amerikaliklarga 600 dollar miqdorida to‘lovlar, shuningdek, ishsiz qolganlarga haftalik 300 dollar miqdorida qo‘shimcha to‘lovlarni o‘z ichiga olgan.
Eslatib o‘tamiz, mart oxirida AQSh Kongressi Senati COVID-19 koronavirus pandemiyasi sharoitida AQSh kompaniyalari, aholisi va sog‘liqni saqlash tizimini iqtisodiy qo‘llab-quvvatlash chora-tadbirlari to‘g‘risidagi qonun loyihasini bir ovozdan ma’qullab, 2,2 trillion dollar miqdorida mablag‘ ajratgan, ushbu moliyalashtirish paketi mamlakat tarixidagi eng yirigi bo‘lgandi. Aprel oyida esa Kongress iqtisodiyotni qo‘llab-quvvatlashga yana 484 milliard dollar ajratish to‘g‘risidagi dasturni ma’qullagandi. Bahorda tasdiqlangan ko‘plab choralar muddati tez orada tugaydi va yangi chora-tadbirlar paketi ularni uzaytirishni nazarda tutadi.
Avvalroq AQSh Moliya vazirligi iqtisodiyotni kuchaytirishga 916 milliard dollar ajratishni taklif qilgani, mamlakatda shatdaunning oldini olish uchun bir kunga budjet qabul qilingani haqida xabar berilgan edi.
Izoh (0)