Меркель канцлер сифатида Германия халқига сўнгги марта Янги йил мурожаатини йўллади

Германия канцлери Ангела Меркель канцлер сифатида Янги йил арафасида сўнгги марта халққа мурожаат қилди, дея хабар бермоқда Reuters’га таяниб «Korrespondent.net».

Меркель ўз мурожаатида 2020 йил 15 йиллик раҳбарлиги давомида энг оғир йил бўлганини айтиб, ватандошларига коронавирус тарқалишига қарши курашда қилган саъй-ҳаракатлари учун миннатдорчилик билдирди.

Ангела Меркель шифокорларнинг хизматларини алоҳида таъкидлаб ўтди. Шунингдек, у пандемияга қарамай, кўплаб одамлар, жумладан, супермаркетларда, юк машиналарида, почта алоқаси шохобчаларида, жамоат транспортида, полиция участкаларида, мактаблар ҳамда болалар боғчаларида, черковлар ва оммавий ахборот воситаларида фаолият юритганларнинг қўшган ҳиссаси туфайли ҳаёт давом этганини таъкидлади.

Меркель COVID-19 пандемиясига қарши кураш асрнинг сиёсий, ижтимоий ва иқтисодий жиҳатдан қийин вазифаси бўлганини маълум қилди.

Германия ҳукумати раҳбари немисларга ниқоб таққани ва ижтимоий масофани сақлагани учун миннатдорчилик билдирди. «Бошқаларга эътибор бериш ва соғлом фикрнинг намоён бўлиши — инсонпарварлик белгиси», — дейди Меркель.

«Сўнгги 15 йил ичида биз ўтган йилни ҳеч қачон бунчалик қийин ўтказмаганмиз ва барча ташвишлар ҳамда баъзи бир шубҳаларга қарамай, ҳеч қачон Янги йилни бунчалик умид билан кутиб олмаганмиз», — деди Германия канцлери.

Ангела Меркель Германия бошқа муаммоларни ҳам эътибордан четда қолдирмаслиги кераклигини айтди ва 2021 йилда коронавирус асосий мавзу бўлмаслигини таъкидлади.

Меркель дунё тез ва тубдан ўзгариб бормоқда, шунинг учун Германия келажак учун бор кучи ва ижодкорона ҳаракати билан дадил ғояларни ишлаб чиқиши керак, деб ҳисоблайди, масалан, иқлимга салбий таъсир кўрсатмайдиган иқтисодиёт соҳасида.

Бундан ташқари, Ангела Меркель мамлакатда белгиланган тартиби бўйича коронавирусга қарши эмланаётганини айтди.

«Бир неча кун олдин пандемия устидан ғалаба қозониш умидлари пайдо бўлди. Бу умидлар биринчи эмланганлар — кекса одамлар ва уларга ғамхўрлик қилаётган реанимация бўлимларидаги тиббиёт ходимлари юзларида акс этди. Нафақат бизнинг мамлакатимизда, балки бутун Европа ва бошқа кўплаб мамлакатларда шундай бўлди», — деди сиёсатчи.

Шунингдек, 66 ёшли Меркель ўз навбати келганда коронавирусга қарши эмланишини маълум қилди. Роберт Кох номидаги Вирусология институтининг эмлаш дастурига кўра, канцлер эмланиш ҳуқуқига эга бўлган тўртинчи гуруҳга (65—69 ёш) киритилган.

Ангела Меркель 2021 йилнинг сентябрь ойидаги сайловларда қатнашмаслиги ва сиёсатдан нафақага чиқиш ниятини яна бир бор тасдиқлади ва бу унинг Германия канцлери сифатидаги сўнгги Янги йил мурожаати эканини маълум қилди.

Аввалроқ Германияда 16 декабрдан бошлаб карантин чоралари кучайтирилгани ҳамда Германияда биринчи бўлиб 101 ёшли аёл коронавирусга қарши эмлангани ҳақида хабар берилганди.