Xiaomi компанияси яқин вақтлар ичида нафақат Мi 11 линейкасини, балки Мi 10 флагманининг арзонлаштирилган версияси — Мi 10i моделини ҳам тақдим этишни режалаштирмоқда, деб хабар беради Hi-Tech.Mail.ru.
Xiaomi Mi 10i тақдимоти 2021 йилнинг 5 январь санасида бўлиб ўтади. У аввалига Ҳиндистонда, шундан сўнг, дунёнинг бошқа давлатларида сотувга чиқади. Афтидан, ушбу смартфон бошқа бир янгиликнинг — ҳозирда Хитойда тақдим этилган Redmi Note 9 Pro 5G’нинг халқаро версиясига айланади.
Ми 10i’нинг янги реклама постида қурилма 120 герци янгиланувчи частотага эга дисплей, 108 мегапикселли камера ва Snapdragon 750 процессорига эга бўлиши ошкор қилинган. Redmi Note 9 Pro 5G ҳам шу каби техник тавсифга эга.
Агарда ростдан ҳам бу турли номларга эга битта смартфон бўлса, Ми 10i’га 6,67 дюмли IPS экран (Full HD+), сиғими 4820 мА/соатга тенг аккумулятор ўрнатилган ва у 33 ваттли тезкор қувватланиш функциясини қўллаб-қувватлайди.
Аввалроқ Xiaomi Mi 11 декабрь охирига қадар тақдим этилиши мумкинлиги тўғрисида хабар берилганди.
Изоҳ (0)