Оммавий ахборот воситалари мамлакатдаги нафақат ижобий ўзгаришларни ётириб, балки долзарб муаммоларни кўтарган ҳолда тобора «тўртинчи ҳокимият»га айланиб бормоқда, дейди Президент Шавкат Мирзиёев 29 декабрь, сешанба куни Олий Мажлисга йўллаган Мурожаатномасида.
«Аччиқ ва танқидий материаллар жойлардаги кўплаб амалдорларга ёқмаслиги, уларнинг тинчини ва ҳаловатини бузаётгани ҳам бор гап. Лекин ошкоралик ва сўз эркинлиги — бу давр талаби, бу Ўзбекистондаги ислоҳотларнинг талаби», — дейди Шавкат Мирзиёев.
«Биз ўтган тўрт йил давомида жамиятимизда ошкоралик ва очиқлик, сўз эркинлиги муҳитида яшаш ва ишлашга аста-секин ўрганиб бораяпмиз. Адолатли журналист ва блогерларнинг танқидий чиқишлари эскича қолипда ишлайдиган раҳбарларнинг фаолиятидаги хато-камчиликларни кўрсатиб, уларни иш услубини ўзгартириш ва масъулиятини оширишга мажбур қилмоқда», — дея таъкидлайди давлат раҳбари.
Шавкат Мирзиёев ОАВни қўллаб-қувватлаш ва ҳимоя қилиш мақсадида Президент администрацияси ҳузурида Ахборот ва оммавий коммуникациялар агентлиги ташкил этилганини эслатиб ўтган.
«Бугунги кунда оммавий ахборот воситалари соҳасидаги ислоҳотларни янги босқичга кўтариш, уларни янада ривожлантириш, мустақил фаолият юритишини ҳар томонлама қўллаб-қувватлаш мақсадида агентлик фаолиятини танқидий қайта кўриб чиқиш лозим, деб ҳисоблайман», — деди давлат раҳбари.
Давлат раҳбари, шунингдек, Ўзбекистон фуқаролик жамиятини ривожлантиришда нодавлат нотижорат ташкилотларини қўллаб-қувватлашда давом этишини таъкидлаган.
«Нодавлат нотижорат ташкилотлар ижтимоий буюртма асосида маҳаллий даражадаги мавжуд муаммоларни аниқлаш, уларни чуқур таҳлил қилиш, ҳал этиш бўйича таклифлар ишлаб чиқиш ва уларнинг бажарилиши устидан жамоатчилик назоратини таъминлашга кенг жалб қилинади. Бундай ўзаро алоқалар биринчи навбатда таълим, маданият, тиббиёт, экология, қурилиш, кадастрни рўйхатдан ўтказиш, транспорт, коммунал хизматлар, бандлик, ижтимоий хизматлар каби соҳаларда кенг амалга оширилиши керак», — дея таклиф билдиради Шавкат Мирзиёев.
2021 йилда ушбу ишни ташкиллаштиришга бюджетдан 60 миллиард сўм маблағ ажратилади.
Шунингдек, Президент Қонунчилик палатасида нодавлат нотижорат ташкилотларининг доимий вакили институтини ташкил этиш таклифини билдирган. У парламент қуйи палатасининг йиғилишларида иштирок этади, самарали жамоатчилик назорати ва ижтимоий шериклик масалалари қабул қилинган қонунларда қандай акс эттирилиши тўғрисида таклифлар киритади.
Изоҳ (0)