O‘zbekistonda inson huquqlari va erkinliklari himoyasi, qonun ustuvorligini ta’minlashga qaratilgan islohotlar davom ettiriladi. Bu haqda Shavkat Mirziyoyev 29-dekabr kuni Oliy Majlisga yo‘llagan Murojaatnomasida ta’kidlab o‘tdi.
Jumladan, Prezidentning ta’kidlashicha, yangi yildan boshlab joriy etiladigan “bir sud—bir instansiya” tamoyili sud qarorlarining adolatli, qonuniy va barqarorligini ta’minlashda bosh mezon bo‘lishi lozim.
Hozirgi kunda viloyat sudlari chiqargan qaror ustidan berilgan shikoyatlar shu sudlarning o‘zida ko‘rib chiqiladi. Birgina 2019-yilda viloyat sudlari qabul qilgan 13 mingga yaqin shunday qarorlar Oliy sud tomonidan o‘zgartirilgan va bekor qilingan.
“Kelgusi yildan boshlab bir-birini takrorlaydigan sud bosqichlari qisqartiriladi. Odil sudlovga xos bo‘lmagan ishlarni nazorat tartibida ko‘rish amaliyoti bekor qilinadi”, — dedi davlat rahbari.
Yangi yildan boshlab fuqarolik, iqtisodiy va jinoyat ishlari bo‘yicha viloyat darajasidagi 3 ta sud 1 ta sud sifatida birlashtiriladi. Sud muhokamasiga qadar sudda ishlarni dastlabki eshitish amaliyoti yangi tartib sifatida joriy etiladi. Bunda ishni to‘xtatish yoki tugatishga asos yetarli bo‘lsa, sud ishni avvalgiday tergov yoki prokurorga qaytarmasdan, o‘zining yakuniy qarorini qabul qiladi.
Bundan tashqari, Shavkat Mirziyoyev jazoni ijro etish tizimida insonparvarlik tamoyilini keng qo‘llash borasidagi ishlar davom ettirilishini ma’lum qildi. Xususan, xalqaro standartlardan kelib chiqib 25 ta manzil-koloniyalar bosqichma-bosqich qisqartiriladi.
“Bundan buyon birinchi marta ozodlikdan mahrum etilgan shaxsga berilgan jazo yengilrog‘i bilan almashtirilsa, u manzil koloniyaga o‘tkazilmasdan, probatsiya nazoratiga olinadi. Mazkur yengillik asosida hozirgi kunda jazo muddatini o‘tayotgan 6 ming nafar shaxsga o‘z mahallasi nazorati ostida oilasi bag‘rida bo‘lish imkoni yaratiladi”, — degan u.
Prezident tezkor qidiruv faoliyatida, tergov organlari va jazoni ijro etishda qiynoqlarning oldini olish tizimini tubdan qayta ko‘rib chiqish zarurligini ta’kidladi.
Izoh (0)