Tailandda xalqaro ommaviy turizm 2021-yilning apreli o‘rtalaridan, boshqa mamlakatlar bilan aviaqatnovlar yo‘lga qo‘yilganidan so‘ng, qayta tiklanishi mumkin. Bu haqda mamlakat Turizm va sport vazirligi rahbari Pipat Ratchakitprakanga tayanib The Bangkok Post xabar berdi.
Vazirning aniqlik kiritishicha, xalqaro reyslarning qayta tiklanishi Tailandda 13—15-aprel kunlari nishonlanadigan Songkran yangi yili oldidan yo‘lga qo‘yiladi.
Amaldorning hisoblashicha, Tailandda koronavirus bilan kasallanish holatlari ortgani sabab 2021-yilning birinchi choragida xorijlik turistlarni jalb etishning imkoni yo‘q. Biroq boshqa mamlakatlardan keladigan yo‘lovchilarga keskin cheklov choralarini qo‘llash rejalashtirilmagan, chunki ayni vaqtda turistlar tomonidan talab juda kam.
Pipat Ratchakitprakanning so‘zlariga ko‘ra, koronavirusga qarshi vaksinatsiya turizm sohasining qayta tiklanishiga ta’sir ko‘rsatmaydi. Dunyoning ko‘plab davlatlarida fuqarolarni emlash boshlanganiga qaramay, Tailand hukumati bu kabi choralarini hozircha ko‘rib chiqqani yo‘q.
“Sog‘liqni saqlash vazirligi kutib turish qaroriga juda jiddiy yondashadi va dori vositalarining salbiy ta’sirini yaxshilab o‘rganadi. Biz vaksina sinovlari o‘tkaziladigan dengiz cho‘chqachalari bo‘lishimiz shart emas”, — deydi vazir.
Eslatib o‘tamiz, avgust oyida Tailand hukumati sayyohlar uchun 2021-yilda ham chegaralar yopiq bo‘lishi mumkinligini inkor etmagandi.
Izoh (0)