Наманган вилоятининг Давлатобод туманида жойлашган отчопарда ҳосил байрамига бағишланган улоқ-кўпкари бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Унда республиканинг барча вилоятлари, шунингдек, қўшни Қирғизистондан келган мингга яқин чавандоз иштирок этди. Отчопарда мусобақани кузатиб борганлар сони ҳам бир неча минг кишидан кам эмас.
Улоқни вилоят ҳокими Шавкатжон Абдураззоқов бошлаб берди ва йиғилганларнинг олқишлари остида чавандозлар билан бирга давра айланди.
— Улоқ-кўпкари мард йигитларнинг машғулоти, бунга ишқибозликнинг ҳам ўзига яраша гашти бор. Далаларимизда ҳосил доимо мўл-кўл бўлсин, биз шундай тадбирларни ташкиллашдан чарчамайлик, — деди Шавкатжон Абдураззоқов.
Ташкилотчилар томонидан совринга тикилган туя, той, бузоқ, қўй-эчки, телевизор ва бошқа қимматбаҳо совғалар улоқни белгиланган жойгача дадил ортмоқлаб борганларга тақдим этилди.
Тадбирни таниқли хонанда Тошпўлат Маткаримов улоқ-кўпкари ва чавандозларга бағишланган қўшиқлари билан қиздирди.
Изоҳ (0)