Хивадаги Тошҳовли саройининг Маданий мерос департаменти билан келишилмасдан бузилган деворини тиклаш ишлари якунига етди, деб хабар бермоқда «Kun.uz».
Хива шаҳрининг ЮНЕСКО рўйхатидаги Ичан-қалъа музей-қўриқхонасида жойлашган сарой 1832—1838 йилларда қурилган. Декабрь ойи бошида саройнинг шарқий қисмидаги деворнинг бир қисми бузилган эди.
Музей-қўриқхона маъмурияти буни деворнинг юқори қисми 20 сантиметргача оғгани ва сўнгги вақтларда жараён тезлашгани билан изоҳлади. Реставрация Маданий мерос департаментидан берухсат амалга оширилди. Реконструкция лойиҳаси илмий-эксперт кенгашига киритилмаган.
Маълумот учун, Ичан-қалъа давлат музей-қўриқхонасидаги ҳар қандай таъмирлаш-тиклаш ишлари Маданий мерос департаменти қошидаги Илмий-эксперт кенгаши хулосаси асосида бажарилиши ва ЮНЕСКО билан келишилиши зарур. Айни пайтда департамент таъмирлаш-тиклаш ишларини ўтказиш бўйича буюртмачи ва пудратчи ташкилотни судга берган.
Эслатиб ўтамиз, 2019 йилнинг августида Александр Македонскийнинг йўқолган шаҳри дея таърифланган Сурхондарё вилоятидаги Кампиртепа ёдгорлигининг девори қулаганди. Ўша йилнинг декабрида Маданият вазирлиги Тошҳовли маданий ёдгорликка ўрнатилган алюмин ромни олдириб ташлаган эди.
Изоҳ (0)