Ҳар бир аёлда одатда 51-53 ёшда кузатиладиган менопаузадан кейин саломатликда муаммолар юзага келиши мумкин. Бу вақтда саломатлик ва организмга эътибор қаратиш ҳамда бефарқ бўлмаслик керак.
Остеопороз
Климаксдан кейинги йилларда аёллар суяги ва қон-томирлари заифлашиб боради. Бунга ушбу даврда суяклар мустаҳкамлиги учун жавоб берадиган эстроген гормонининг камайиши сабаб бўлади. Шу боис менопаузадан кейинги биринчи 5 йилликда аёллар суяги 20-30 фоизга мўртлашади. Шуни инобатга олган ҳолда кальций истеъмол қилиш, жисмоний машқлар бажариш ҳамда кальцийни чиқариб юбориш хусусиятига эга бўлган спиртли ичимликлар, натрий ва ширин ичимлик истеъмол қилишни камайтириш керак.
Милк касаллиги
Эстроген гормони камайишининг салбий оқибатларидан яна бири пародонтоз ва тишлар тўкилиши ҳисобланади. Гап шундаки, кальций камайиши нафақат суяклар, балки тишга ҳам таъсир қилмай қолмайди. Шу сабаб ҳам айнан мазкур муаммо аёлларда кўп кузатилади. Шунингдек, ушбу даврда аёллар оғиз қуриши, милкда ловуллаш ва таъм билишда ўзгариш кузатилади. Бу вақтда оғиз бўшлиғи гигиенасига амал қилиш ҳамда мунтазам равишда стоматологга ташриф буюриш керак.
Апноэ
Уйқу вақтида нафас олишнинг қисқа муддатга тўхташи оқибатида қонда кислород камайиши билан намоён бўладиган апноэ аёлларда 90 фоиз ҳолатда аниқланмайди ва бу эркакларга хос касаллик деб ҳисобланади. Бунга эса уларда хуррак отиш ва кундузи уйқу босиши сингари симптомларнинг кузатилмаслиги сабаб бўлади. Аммо уйқусизлик, тонгда бош оғриши, чарчоқ, депрессия, шунингдек, хавотирланишнинг ошиши шифокорга мурожаат қилиш учун жиддий сабаб бўлиши керак.
Қандли диабет
Менопауза 46 ёшдан аввал ёки 55 ёшдан кейин кузатилган аёлларнинг қандли диабетга чалиниш хавфи юқори бўлади.Ушбу давр ўз вақтида кузатилган тақдирда ҳам саломатликка бефарқ бўлмаслик керак. Чунки эстроген камайиши инсулинга ҳам таъсир кўрсатади. Ҳомиладорлик вақтидаги қон босимининг ошиши ёки тухумдонлар поликистози синдроми каби омиллар ҳам хавфнинг ошишига сабаб бўлиши мумкин.
Юрак касаллиги
Тухумдонларда ишлаб чиқариладиган эстроген гормони юракни мустаҳкам бўлишида муҳим рол ўйнайди. «Яхши» холестеринни кўпайтиради ёмонини эса аксинча камайтиради, қон томирларни кенгайтиради ҳамда қон босими кўтарилишини олдини олади. Ҳар саккизинчи 46 ёшдан 65 ёшгача бўлган аёл юрак қон-томир касалликларидан азият чекади, 65 ёшдан катта аёлларда эса ушбу кўрсаткич икки карра қисқаради. Шу сабаб ҳам инфаркт ёки инсультга хос симптомларни билиш ва уларнинг олдини олишга ҳаракат қилиш керак.
Сут бези саратони
Ёш ўтгани сайин сут бези саратонига чалиниш хавфи кўпайиб боради. 30 яшар аёлда мазкур турдаги саратон учраш хавфи 1:227 бўладиган бўлса, 60 ёшда деярли 10 карра кўп: 1:28 бўлади. Тиббиётда ушбу саратонни буткул олдини олиш усули бўлмаса ҳам, бир нарса аниқ: ортиқча вазн унинг келиб чиқишининг асосий сабабларидан. Менопаузадан кейин вазнингиз қанча кам бўлса, саломатлигингиз билан боғлиқ муаммолар ҳам унчалик кўп бўлмайди.
Аутоиммун касалликлар
Маълумотларга қараганда, аутоиммун касаллигига учрайдиган беморларнинг 75 фоизини аёллар ташкил қилади. Менопауза даврини бошидан ўтказган аёлларда эса ушбу касалликка чалиниш хавфи кўпроқ бўлади. Тадқиқотчилар бунинг аниқ сабабини билмайди, аммо айнан климаксдан кейин волчанка (тери силининг бир тури), ревматоид артрит ҳамда Гравес касаллиги (қалқонсимон без касаллиги) кузатилиши мумкинлиги ҳақида огоҳлантиради.
Изоҳ (0)