Венгрия 26 декабрь, шанба куни Франция ва Германия каби мамлакатларда эмлашлар ўтказилишидан бир кун олдин COVID-19’га қарши эмлашни бошлади. Бу ҳақда Reuters хабар бермоқда.

Фото: Reddit

Pfizer ва BioNTech томонидан ишлаб чиқилган вакцина дастлаб Будапештдаги касалхона ходимларига қўлланилди. Таъкидланишича, дозаларнинг биринчи партияси 4875 кишини эмлашга имкон беради.

Инъекцияни биринчи бўлиб қабул қилган киши Дел-Пешт марказий касалхонаси шифокори Адриенна Кертес бўлди.

Маълум қилинишича, Венгрияда вакцинация Евроиттифоқнинг бошқа аъзолари, шу жумладан, Франция, Германия, Италия, Австрия, Португалия ва Испаниядан бир кун аввал бошланди.

450 миллионга яқин одам яшайдиган Европа Иттифоқи бўйлаб оммавий эмлаш кампанияси дунё бўйлаб 1,7 миллиондан ортиқ одамнинг ҳаётига зомин бўлган, иқтисодиётга зарар етказган ва корхоналар ҳамда иш жойларини йўқ қилган пандемияни тугатиш йўлидаги ҳал қилувчи қадам бўлиши кутиляпти.

Ҳозиргача Буюк БританияРоссияАҚШШвейцария ҳамда БААда оммавий эмлаш бошланди.