Netflix 34 ёшли актёр Шайа ЛаБафнинг номзодини «Аёл парчалари» драмасидаги роли учун «Оскар» ва бошқа мукофотларга илгари сурмасликка қарор қилди. Сервис унинг исмини жорий мавсумдаги фильмлар учун яратилган For Your Consideration бўлимидан олиб ташлаган, деб хабар беради «Korrespondent.net».
Актёрнинг исми, шунингдек, картина синопсиси ва унинг яратувчилари қаторидан ҳам йўқолиб қолган. Шайа ЛаБаф «Трансформерлар» ва «Индиана Жонс ва Биллур чаноқлар қироллиги» фильмларидаги роллари билан машҳурликка эришган. Бундан ташқари, у «Паранойя» ҳамда «Илмоқда» триллерларида ҳам бош ролни ижро этган.
2020 йилда у иккинчи пландаги роли учун мукофотга лойиқ кўрилиши мумкин эди. Бироқ барчасини унинг собиқ севгилиси пучга чиқарди. Яқинда FKA Twigs тахаллуси билан танилган 32 ёшли Талия Дебретт Барнетт актёрни жинсий ва жисмоний зўравонликда айбланган эди.
ЛаБаф The New York Times’нинг сўровига жавоб бериб, вазиятни изоҳлаган: «Менинг алкоголизмим ёки агрессиямни оқлаб бўлмайди, фақат буни тушунтириб бера оламан. Мен узоқ йиллар ўзимга ва атрофдагиларда шафқатсиз эдим. Энг яқин инсонларимнинг ҳам дилини оғритганман. Кимга озор берган бўлсам афсусдаман. Бошқа ҳеч нарса дея олмайман».
Аниқ айбловлар борасидаги саволга у «юқоридагиларнинг аксарияти ҳақиқатга мос келмаслигини» таъкидлаган.
Изоҳ (0)