Mercedes-Benz компанияси автомобиль салонидаги ҳавони фильтрловчи самарали тизимни жорий этишни бошлаган ишлаб чиқарувчилар қаторига қўшилди. Янги технологиядан биринчи бўлиб EQS электролифтбеки харидорлари фойдаланиб кўриши мумкин. Бунинг учун Штутгартда худди операция хонасидагидек бактериологик тозаликни таъминлашга қодир иқлим мосламаси яратилди, деб хабар беради Motor.
Mercedes-EQ линейкасининг «яшил» флагмани 2021 йилда бозорга чиқади. Бироқ компания ҳозирдан мижозларни у тарихдаги энг технологик ва хавфсиз автомобиль бўлишига тайёрлаб бормоқда. MBUX мултимедиаси, қўшимча сунъий интеллект ва мустақил ўрганиш механизмидан ташқари, электролифтбек мураккаб ва юқори самарадорликка эга ҳаво фильтрловчи тизимга эга бўлади. У HEPA (High Efficiency Particulate Arrestance) фильтридан фойдаланади ва соҳада биринчи бўлиб DIN EN 1822 стандарти бўйича сертификатга эга бўлди.
Бу EQS салонида биологик тоза ҳаво бўлишини билдиради. HEPA фильтрининг ўлчами тўртта А4 қоғозичалик келади ва у капот остидан ўрин олади — ҳажми 10 литрга яқин. У PM 2.5 бўлган майда диспер аэрозол зарраларни, азот оксиди, олтингугурт оксиди ва ёқимсиз ҳидларни тутиб қолишга қодир. Буларнинг барчаси Progressive Luxury стратегиясининг бир қисми бўлиб, Mercedes-Benz унинг доирасида «мижозларга инновацион технология ва қулай экологик сервисларни очади».
Шу каби сервислардан бири — Mercedes me Charge. 2021 йилдан компания ҳар бир қувватлантириш сессияси учун ишлатилган электр энергияси қайта тикланадиган электр манбаларидан олиниши тўғрисидаги кафолатни тақдим этади.
Эслатиб ўтамиз, март ойида Хитойнинг Changan компанияси ўз автомобилларини коронавирусдан ҳимоя қилишни бошлаган эди.
Изоҳ (0)