Ижтимоий тармоқларда 2020 йилнинг 23 декабрь куни «Фуқаронинг ўлимига 3 йилдан ошган бўлса-да, унга жарима белгиланди» сарлавҳаси остидаги хабар тарқалди. Хабар юзасидан ЙҲХББ изоҳ берди.
Маълум қилинишича, 2020 йилнинг 29 июнь куни Сирдарё вилояти, Мирзаобод тумани ҳудудида ҳайдовчи, 1954 йилда туғилган Жалолов Собиржон ўзига тегишли бўлган Matiz русумли, 60 О 510 LA давлат рақам белгили автомобилда, йўл ҳаракати қоидаларининг 9-бандида белгиланган талабни бузган ҳолда хавфсизлик камарини тақмасдан ҳаракатланган.
Ҳайдовчи туман ИИБ ЙҲХБ ЙПХ ходими С.Абдунабиев томонидан тўхтатилган ва унга нисбатан қоидабузарлиги юзасидан маъмурий баённома расмийлаштирилган.
Туман ИИБ ЙҲХБ маъмурий амалиёт ходими томонидан фуқаро С.Жалоловга нисбатан тузилган баённома КААТ марказлашган дастурига киритилиши вақтида ушбу фуқаро билан исм-фамилия ва туғилган йили бир хилликда бўлган, Самарқанд вилоятида яшаган, 1954 йилда туғилган Жалолов Собиржоннинг рўйхатда турган манзили бўйича жазо қўллаш тўғрисидаги жарима қарори чиқарилган.
Самарқанд вилоятида рўйхатда турган, 1954 йилда туғилган Жалолов Собиржонга нисбатан чиқарилган қарор белгиланган тартибда бекор қилинганлигини маълум қилиб, йўл қўйилган камчиликлар учун узр сўралган.
Аввалроқ Тошкентда эшакни Spark’да судраган ҳайдовчи, Гулистондаги чорраҳада рақсга тушган ТикТок’чи йигитлар ҳамда Сурхондарёда «тўхташ тақиқланади» белгиси остида қолдирилган ИИБга қарашли Lacetti ҳамда Captiva жаримага тортилгани ҳақида хабар берилганди.
Изоҳ (0)