Аргентина Россияда яратилган коронавирусга қарши «Спутник V» вакцинасини рўйхатдан ўтказди. Бу ҳақда вакцинани ишлаб чиқаришни мувофиқлаштирувчи Россиянинг тўғридан-тўғри инвестициялар жамғармасига таяниб, Meduza хабар берди.
Фото: «РИА Новости»
Вакцина Россияда ўтказилган клиник тадқиқотлар асосида ва Аргентинанинг ўзида қўшимча синовларсиз, тезлаштирилган жараён доирасида маъқулланган.
Қайд этилишича, вакцинанинг дастлабки 300 минг дозаси Аргентинага 24 декабрь куни етказиб берилади. Эмлашнинг ўзи эса 28 декабрда бошланади.
Россиянинг тўғридан-тўғри инвестициялар жамғармаси Аргентинага жами 10 миллион доза «Спутник V» вакцинасини жўнатиш ҳақида келишувга эришган.
Аргентина «Спутник V» вакцинасини қўллашни маъқуллаган иккинчи хорижий давлат бўлди. Биринчи бўлиб 21 декабрь куни Беларусь бу ишни амалга оширган.
«Спутник V» Аргентинада фойдаланиши бошланадиган биринчи коронавирусга қарши вакцина бўлади. Мамлакат расмийлари 22 декабрь куни Pfizer ва BioNTech компаниялари томонидан яратилган вакцинани қўллашни ҳам маъқуллаган, бироқ бу вакцинани етказиб бериш январь ойидан олдин амалга оширилмайди.
23 декабрь куни маълум бўлишича, «Спутник V» синовларидан қатнашаётган россиялик кўнгиллиларга бундан кейин плацебо қилинмайди. Плацебо олганларнинг кўпчилиги таҳлил натижалари асосида бундан хабар топган ва вакцинанинг ўзини қабул қилган. Клиник синовлар бўйича ташкилотлар уюшмасининг ижрочи директори Светлана Завидованинг маълум қилишича, бу вакцина синовининг муваффақиятсизликка учраганини англатади.
