BioNTech 6 ҳафта ичида коронавируснинг янги штаммига қарши вакцина яратишга тайёрлигини маълум қилди

BioNTech раҳбари Угур Шахин 22 декабрь куни унинг компанияси янги COVID-19 штаммига қарши вакцинани олти ҳафта ичида тақдим этиши мумкинлигини айтди, дея хабар бермоқда Европа оммавий ахборот воситаларига таяниб «Интерфакс».

«Техник жиҳатдан олти ҳафта ичида янги вакцинани тақдим этишимиз мумкин», – деди Шахин. У компаниясининг вакциналарни ишлаб чиқариш бўйича махсус технологияси бунга қисқа вақт ичида эришишга имкон беришини таъкидлади.

Шунингдек, у ўзининг компанияси томонидан АҚШнинг Pfizer концерни билан биргаликда ишлаб чиқарилган вакцинанинг Буюк Британияда тарқалган коронавируснинг янги мутациясига қарши самарали бўлишини айтди.

«Буни тадқиқотлар ўтказилгандан сўнг аниқ билиб оламиз ва бу, тахминан, икки ҳафта давом этади. Аммо вакцинамизнинг (янги штаммга қарши) фойда бериши эҳтимоли жуда юқори», – дея қўшимча қилди олим.

Коронавируснинг янги штамми

Буюк Британияда коронавируснинг янги тури аниқлангани, шу туфайли мамлакатнинг айрим ҳудудларида касаллик тарқалиш суръати тезлашгани ҳақида 14 декабрь куни маҳаллий Соғлиқни сақлаш вазирлиги раҳбари Мэтт Хенкок маълум қилди. Буюк Британия бош вазири Борис Жонсоннинг сўзларига кўра, ушбу турдаги коронавирус аввалгиларидан 70 фоизга юқумлироқ, лекин ундан хавфли эмас.

Жаҳон соғлиқни сақлаш ташкилоти 20 декабрь куни Британияникига ўхшаш коронавирус Нидерландия, Дания ва Австралияда ҳам аниқланганини эълон қилди. Ҳозирда ташкилот бу штаммни ўрганмоқда.

Аввалроқ Жанубий Африка Республикаси (ЖАР)да ҳам ўхшаш мутациядаги вирус топилгани ҳақида хабар берилган эди. Вируснинг янги варианти ҳозирги вакциналар ҳосил қиладиган иммунитетдан кучлироқ бўлиши мумкин, деган тахминлар учун ҳозирча бирор-бир асос йўқ. Буюк Британия 8 декабрь куни Ғарб мамлакатлари орасида биринчилардан бўлиб коронавирусга қарши Pfizer ва BioNTech компаниялари томонидан ишлаб чиқилган дори воситаси билан оммавий вакцинация қилишни бошлаган эди.

Европанинг бир қатор мамлакатлари — Нидерландия, Бельгия, Австрия ва Италия кабилар Буюк Британия билан авиақатновларни тўхтатишини эълон қилиб улгурди. Ирландия, Франция ва Германия, шунингдек, Исроил ҳам шундай қарор қабул қилиш масаласини кўриб чиқмоқда. Bild нашри маълумотларига кўра, Германия канцлери Ангела Меркель Европа Иттифоқидаги ҳамкасблари билан Буюк Британиядан Евроиттифоққа парвозларни 20 декабрь оқшомидан то 2021 йил 6 январигача мувофиқлаштирилган ҳолда тақиқлаш бўйича келишишни режалаштирмоқда. Бундан ташқари, Европа Иттифоқи ва ЖАР ўртасидаги авиақатновлар чекланиши, Буюк Британия билан темир йўл ва паром алоқаси ҳам тўхтатилиши мумкин.

Шунингдек, янги штамм сабаб Саудия Арабистони, Россия ва 20 дан ортиқ мамлакат авиақатновларни чеклади. Шу жумладан, Ўзбекистон ҳам етти давлат билан авиарейсларни тўхтатди.