Ўзбекистонда порнография ва тақиқланган контентни тарқатганлик учун солинадиган жарима миқдори оширилади

Ўзбекистонда порнографик маълумотлар ва маҳсулотларни, зўравонлик ёки шафқатсизликни тарғиб қилувчи материалларни тарқатганлик учун солинадиган жарима миқдори оширилади. Маъмурий жавобгарлик тўғрисидаги кодексга киритилган тегишли ўзгартиришлар тўғрисидаги қонун Олий Мажлис Сенати томонидан 18 декабрдаги йиғилишда маъқулланган, деб хабар беради «Gazeta.uz».

Маъмурий жавобгарлик тўғрисидаги кодекснинг 189-моддасига киритиладиган ўзгартиришга кўра, порнографияни тарғиб қилувчи маҳсулотни тарқатиш, реклама қилиш, намойиш этиш мақсадида тайёрлаш ёки Ўзбекистон ҳудудига олиб кириш, худди шунингдек, уни тарқатиш, реклама қилиш, жумладан ОАВ, телекоммуникация ёки интернетда (қўшимча) намойиш этиш фуқароларнинг БҲМнинг 50 дан 400 бараваригача (ҳозирда 50 дан 100 бараваригача), мансабдор шахслар учун эса — 100 дан 450 бараваригача (ҳозирдан 100 дан 150 бараваригача) жарима белгиланишига сабаб бўлади. Шунингдек, порнографик маҳсулотларни тайёрлаш, тарқатиш, реклама қилиш ва намойиш қилиш воситалари ҳам мусодара қилинади.

Маъмурий жавобгарлик тўғрисидаги кодекснинг 189-1-моддасига кўра, зўравонликни ёки шафқатсизликни тарғиб қилувчи маҳсулотни, шунингдек уни тайёрлаш, тарқатиш, реклама қилиш, жумладан ОАВ, телекоммуникация тармоқлари ёки интернетда (қўшимча) намойиш этиш, воситаларини мусодара қилиб, фуқароларга базавий ҳисоблаш миқдорининг 50 бараваридан 400 бараваригача (ҳозирда — 50 дан 100 бараваригача), мансабдор шахсларга эса 100 бараваридан 450 бараваригача (ҳозирда — 100 дан 150 бараваригача) миқдорда жарима солинишига сабаб бўлади.

Қонунга оид тушунтириш хатида қайд этилишича, телекоммуникация тармоқлари ва интернетда порнографик маълумот ва маҳсулотларни жойлаштириш, зўравонлик ва шафқатсизликни тарғиб қилиш қарши ўрнатилаётган қонунчилик «шу каби маҳсулотларнинг тарқалишини чеклашга ёрдам беради».

Маълумот учун, 2020 йилда порнографик маҳсулотларни тайёрлаш ва тарқатиш бўйича 182 киши маъмурий жавобгарликка тортилган.

Бундан ташқари, Маъмурий жавобгарлик тўғрисидаги кодекснинг 25-моддасига ҳам ўзгартириш киритилаётган бўлиб, унга кўра, алоҳида қонунбузарлик учун ўрнатилган жарималар миқдори 450 бараваргача (ҳозирда — 200 бараваргача) оширилади.

Аввалроқ Ўзбекистонда туҳмат ва ҳақорат учун енгилроқ жазолар белгиланиши кутилаётгани тўғрисида хабар берилганди.