Бухоро шаҳар прокурори Жасур Фозиловга нисбатан тайинланган хизмат текшируви давом этади. Бу ҳақда унинг ўзи «Дарё» мухбирига берган интервьюсида айтиб ўтди.
20 декабрь оқшомида Бухоро шаҳар прокурори Жасур Фозилов ўз хизмат вазифасини бажаришга қайта киришгани ҳақида хабарлар тарқалди, Бош прокуратура матбуот хизмати бу хабарларни тасдиқлади. У 2 декабрь куни Бухоро тадбиркорнинг шаҳар прокурори устидан ёзган аризаси сабаб тайинланган хизмат текширувини холисона олиб бориш мақсадида вазифасидан вақтинча четлатилган эди.
Жасур Фозилов хизмат вазифасидан вақтинча четлатилгач, бир неча кун давомида ижтимоий тармоқлар орқали (жумладан, Президент Шавкат Мирзиёевга) мурожаатлар қилган, хусусан, Бош прокуратура масъуллари ҳам турли шубҳали ишларга аралашган бўлиши мумкинлиги ҳақида баёнотлар берган эди. Унинг бу мурожаатлари юзасидан Республика идоралараро комиссияси тузилган эди.
Прокурор Фозиловнинг алоҳида таъкидлашича, комиссиянинг «хизмат текшируви билимдон ва ўз соҳасининг тажрибали мутахассислари томонидан ўтказилган». Текширув натижасига кўра, Фозиловнинг тадбиркорларни терговга чақиришда қонун талабларини бузгани аниқланган ва ушбу ҳолат юзасидан унга нисбатан интизомий жазо қўлланиши тўғрисида қарор қабул қилинган.
«Хизмат текшируви хулосаси мени қаноатлантирди», — дейди Бухоро шаҳри прокурори. У бундай «адолатли қарор» чиқарилишига туртки бергани учун журналист ва блогерларга миннатдорчилик билдирган.
«Мен лавозимимга тикланмадим, балки, текширув натижасига кўра, вазифамни 21 декабрдан яна давом эттиришга киришдим. Бироқ бу ҳаммаси тугади, дегани эмас. Ўзимга нисбатан ҳам, илгари «Дарё»га берган интервьюмда айтиб ўтилган айрим шахсларга нисбатан ҳам текширувлар тўхтамаган. Текширувлар якунлангач, қўлланилган жазо чоралари ҳақида қўшимча ахборот берилади, албатта...», — деди Фозилов.
Прокурор ўзи қайд этиб ўтган ҳолатлар бўйича текширувлар Республика идоралараро комиссияси томонидан адолатли давом эттирилаётганини алоҳида таъкидлади. «Қонунбузилишига йўл қўйганлар, барибир, жавоб беради. Бу қонунчиликда бор нарса», — дея қўшимча қилди у.
Изоҳ (0)