Tashkent City анжуманлар залида «Тошкент ёшлар форуми – 2020» доирасида 19 декабрь куни ёшлар миграцияси масалаларига бағишланган халқаро конференция ўтказилди, дея хабар қилмоқда «Kun.uz».

Тадбирда Олий Мажлис қонунчилик палатаси спикери ўринбосари Акмал Саидов ҳам чиқиш қилди. У мазкур чиқишида пандемия иммиграция борасида бутун дунёда йирик муаммоларни пайдо қилгани ва бу жараёнда кучсиз қатлам – муҳожирлар энг кўп азият чекаётганини таъкидлади.

Спикер ўринбосари шундай пайтда мигрантларга ёрдам кўрсатишнинг муҳимлиги ҳақида гапириб, бир неча ой аввал ўзбекистонлик муҳожирларга чет давлатларининг ўзида ёрдам кўрсатиш бўйича кўтарилган чақириқларни танқид қилди.

«Кимлигини айтмай қўя қолай. Бир неча ой аввал ўзбек мигрантларига чет давлатларининг ўзида ёрдам кўрсатиш бўйича чақириқлар пайдо бўлди. Таклиф беришда ҳам ўйлаш керак. Хўш, Россияда бир кунлик яшаш харажатлари қанчага тушишини биласизми?

Биз мигрантларга бундай пайтда ватанга қайтиш учун етарлича шароит қилиб беришимиз лозим. Мен депутатлардан ижтимоий тармоқлар орқали турли хил популистик чақириқлардан йироқ бўлишларини сўрардим», – деган Акмал Саидов.

Эслатиб ўтамиз, «Миллий тикланиш» демократик партияси Марказий кенгаши раиси Алишер Қодиров бир муддат аввал чет элдан ўзбекистонликларни ватанга қайтаришни вақтинча тўхтатиб, уларни турган мамлакатларида даволанишларини молиялаштириш таклифини билдирган эди.

«Хориждан ватандошларимизни олиб келишни тўхтатиш, улар турган мамлакатларида даволанишларини молиялаштириш ҳақида ўйлашимиз керак. Бу биринчи навбатда, ўша ватандошимизнинг қариндошларига, қолаверса, бутун Ўзбекистонга яхшилик бўлади», – деган сиёсатчи.

Маълумот учун, қонунчилик палатаси спикери ўринбосари Акмал Саидов ҳам мансублиги бўйича «Ўзбекистон миллий тикланиш» партияси аъзоси ҳисобланади.

Эслатиб ўтамиз, 2019 йилги Олий Мажлис Қонунчилик Палатаси депутатлигига сайловнинг дастлабки натижаларига бағишланган сессияси давомида Ўзбекистон Халқ демократик партияси лидери Улуғбек Иноятов «Миллий тикланиш» демократик партияси лидери Алишер Қодиров депутатликка популистлиги сабаб сайлана олмаганини айтган эди. Бунга Алишер Қодиров «Популизм бу халққа хизмат қилишдир», дея жавоб қайтарган.